"සාවිත්‍රී.., මං තෝරා ගත්තු ගීත එකතුවේ මීලඟ ගීතය මම වෙන් කලේ මගෙ ආදරය වෙනුවෙන්..."
බ්‍රේක් එකකින් පස්සෙ ඔන් එයා ගිය ගමන් පුරුදු කාරයෙක් වගේ ඩිලාන් කිව්වම මම ටිකක් පුදුම උනා..කැමරා ඉදිරියෙ අවුරුදු ගණනාවක් ර‍ඟපෑම් කල සමහර ප්‍රසිද්ධ චරිත වලටත් වඩා හොඳට මේ ආරාධිතයා ස්ටූඩියෝ එකට හුරු වෙලා තිබ්බා..
"මගේ පලවෙනි ආදරය මට මුණ ගැහෙන්න පාසල් යන කාලෙදිමයි.. ඇය ඉතාම හුරු බුහුටි හරිම පිලිවෙල කෙනෙක් ඒ කාලෙ.මම ඇතුලුව සම වයසෙ හිටි හැමෝම හිතුවෙ ඒ වගේ පෙනුම සහ ඉගෙන ගන්න දක්ශ කෙනෙක් කා එක්කවත් පෙම් සබඳතාවයකට එකඟ වෙන එකක් නෑ කියන එක.ඒ කාලෙ මගේ පෙනුම එක්ක මම වගේ කෙනෙක්ට එයා කොහොමටවත් කැමති වෙයි කියලා හිතන්න බෑ.. "
"දෛවයේ මුණුගැස්වීම් හරි පුදුම සහගතයි සාවිත්‍රී.. "
"අර කැමති වෙන්න කිසිම හේතුවක් නොතිබ්බ කෙනා අහම්බයෙන් වගේ උසස් පෙල පංති වලදි මගේ එක්ක ප්‍රේම සම්බන්ධයක් පටන් ගන්න කැමති වෙනවා...ගොඩාක් අය විශ්මයෙන් අපි දිහා බලද්දි අපේ සම්බන්ධය ගලාගෙන ගියා.ඇත්තටම ආදරේ කරනව කියන්නෙ මොකක්ද කියලා හරි අදහසක් අපිට ඒ කාලෙ තිබ්බා කියලා මම හිතන්නෙ නෑ..අපි ඒ කාලෙ කලේ ඉඩක් ලැබෙන වෙලාවට ආගිය තොරතුරු කතා කරපු එක.."
සුන්දර අතීතය සිහිපත් කරන හැම විටම ඩිලාන්ගේ ඇස් දීප්තිමත් ව බැබලුන හැටි මට ආයෙමත් සිහිපත් විය. එක එල්ලේ මගේ දිහා බලාගෙන ඔහු බොහොම සැහැල්ලුවෙන් වැඩසටහන ට සහභාගී වෙද්දී මම වික්ශිප්ත වී සිටියෙමි... මේ ඔහුගේ පලමු ගුවන් විදුලි වැඩසටහන යැයි කීම බොරුවක් විය හැක. එසේ නොමැති නම් නුපුරුදු පුද්ගලයෙකුගෙන් මෙවැනි හැසිරීමක් දැකිය හැකි නොවේ..
"සම්බන්ධය පටන් අරන් මාස දෙක තුනක් ගත වෙද්දි ඇයට එය නතර කරන්න උවමනා වෙනවා..මං හිතන්නෙ පෙම්වතියක් වීම ඇයට අමතර බරක් වෙන්න ඇති.. නමුත් ඒ සම්බන්ධය නිසා ඇයට එක වාසියක් ලැබුණා.අපේ සම්බන්ධය දැනගත්තු එයාගෙන් ආදරය පැතුව පිරිමි ලමයි ආයෙ එයා පස්සෙන් ආවෙ නෑ..."
" කිසිම කෙනෙක් බලෙන් ලඟ තියා ගන්න උවමනා නෑ කියලා විශ්වාස කරපු මම හිතේ කනගාටුවෙන් උනත් සම්බන්ධය නතර කරන ඉල්ලීමට එකඟ වෙනවා.. "
"ඔය සිද්ධියෙන් පස්සෙ ඒ වෙද්දි මම පුරුදු වෙලා හිටිය පාන්දරින් පාසලට යන්න තිබ්බ උනන්දුව මගෙන් නැති වෙලා ගියා.මොකද තවදුරටත් පාන්දරින් පාසලට ගිහින් ගුඩ් මෝනිංග් කියන්නවත්, ගෙදර මල් වැලෙන් කඩා ගනිපු පිච්ච මලක් අතට දෙන්නවත් කෙනෙක් නැහැනෙ.... මූණෙන් උනත් ඒ අහිමිවීම පෙන්නුම් කරන්න ඇති.... ඒ නිසාමද කොහෙද සතියකට හෝ දෙකකට පස්සෙ නැවතත් ඇයම කිසිම දෙයක් සිද්ද නොවුන ගානට මගෙත් එක්ක කතා කරන්න පටන් ගන්නවා...ඇයට මම දුකෙන් හිටි හැටි දරාගන්නට අපහසු වෙන්න ඇති.., එහෙමත් නැත්තම් එයාගෙ හැසිරීම නිසා තව කෙනෙක් දුක් වෙනවා කියන එක වරදක් කලා වගේ දැනෙන්න ඇති.."
"දෙවෙනි වතාවටත් උත්සාහ කරපු උසස්පෙල විභාගයෙන් පස්සෙ විභාගය අසමත් උන මම රැකියාවක් හොයාගෙන යද්දි ඇය විශ්ව විද්‍යාල අධ්‍යාපනයට යොමු වෙනවා..මට තුන් වෙනි අවස්ථාවටත් උත්සාහ කරන්න තරම් හැකියාවක් තිබ්බෙ නෑ.. ඒ වෙද්දි පවුලෙ එකම ආදායම උන අම්මගෙ වෙලඳ සේවිකා රැකියාව අහිමි වෙලා එදා වේල පිරිමහ ගන්නත් අමාරු තැනක අපි හිටියෙ..."
"මම ආදර්ශමත් මනුස්සෙක් නෙවෙයි සාවිත්‍රී..මගෙ ජීවිතේ අඩු වැඩි වශයෙන් කලු , සුදු දෙවර්ගයම තියෙනවා... "
"පෙම්වතිය කිලෝ මීටර සියයකට වඩා ඈත නගරයක විශ්ව විද්‍යාල අධ්‍යාපනය ලබද්දී මම ගෙදර ඉඳන් රැකියාවට ගියා.. "
"රැකියාවට යන අතර තුර මුණ ගැහුනු ගැහැනු ලමයෙක් එක්ක නමක් නොදන්නා සම්බන්ධයක් ඇති උනේ මටත් නොදැනිමයි. .. ස්ථිර වශයෙන්ම ඒක ආදර සම්බන්ධයක් නෙවෙයි.. යෞවන කාලෙ ඇති වෙන හැඟීම් සහ ආසාවල් සංතෘප්ත කර ගන්න ඇති කරගත්තු සම්බන්ධයක්..මම ඒ වෙද්දිත් පෙම්වතෙක් බව මේ අලුත් හිතවතිය දැනන් උන්නා.."
"මුණ ගැහීම් කීපයකට පස්සෙ මට ඒ නමක් නොදන්නා සම්බන්ධය එපා වෙනවා.. ඒ වෙද්දි මගේ පෙම්වතිය විශ්ව විද්‍යාල අධ්‍යාපනය අවසන් කරලා ආයතනගත පුහුණුවක ඉන්න කාලෙ.. මට එක්තරා දවසක නාඳුනන අංකයකින් දුරකතන ඇමතුමක් ආවා.. කාගෙද නමක් කියලා ඒ මමද අහන්න තමයි ඒ පුද්ගලයා කෝල් කරලා තිබ්බෙ.."
"අදාල කෙනා මම නොවෙන බව කියලා දුරකතනය විසන්ධි කරන්න යද්දි තමයි මම හරි කාරණාව දැන ගත්තෙ.ඒ කතා කරලා තිබ්බෙ මගේ පෙම්වතියගෙ පෙම්වතා.. ඔව් ඇය මගේ එක්ක අවුරුදු හතක ප්‍රේම සම්බන්ධයක් තියාගෙනත් තව කෙනෙක් එක්ක යාලු වෙලා තිබ්බා. ඒ වෙද්දි ඒ සම්බන්ධයට මාස හයක්.. ඔවුන් වැඩිපුර මුණ ගැහිලා තිබ්බෙ හෝටල් කාමර අස්සෙදි..පෙම්වතිය සති අන්තයේ නිවාඩුවට ගෙදර එන්න කලින් දවසෙ රැයත් ගෙදර ඉඳන් ගිය දවසෙ රැයත් ඔවුන්ට ඒකට ඉඩ හදලා තිබ්බා.."
"පාඩම් වැඩ වෙනුවෙන් අපිට කතා කරන්න තිබ්බ කාලයත් ඇයට දීලා පංති සාමාර්ථයක් එක්ක උපාධිය සම්පූර්ණ කරන්න දන්න තරමින් උපකාර කල, අවස්ථාව හදලා දුන්න මං වෙනුවට ඇය තෝරාගෙන තිබුණේ බස් රථයක කොන්දොස්තර වරයෙක්.. බීමත් කමට තදින්ම විරුද්ධ ඇය ඇගේ අලුත් පෙම්වතා බීමත්ව යතුරු පැදියෙන් යද්දි අත් අඩංගුවට ගත්තම දඩ මුදල් ගෙවන්නට මුදල් අරන් තිබුණේ ඇගේ එදිනෙදා වියදම් වෙනුවෙන් මම මගේ වැටුපෙන් මාස්පතා මුදල් තැම්පත් කල ගිණුමකින්.."
"දමිත් අසංක කියන ගායකයා මේ ගීතයේ එක තැනක, ඒ වේදනාව බර වැඩියි.... කියලා හරි හැඟීම් බරව ගයද්දි අදටත් මට මගේ පපුවේ යම් දෙයක් හිරවෙනවා වගේ දැනෙනවා..ඒ සිදුවීම දවස් ගණනක් රෑ අඩ නින්දෙන් මාව වෙව්ලව්වා.. හරියට මීට කලින් මම මතක් කරපු අවාසනාවන්ත සිද්දියෙදි වගෙම..."
"සාවිත්‍රි, මම අනුගමනය කරන බෞද්ධ දර්ශනයේ කියවෙන බොහෝ දේවල් ප්‍රායෝගිකයි කියලා මම විශ්වාස කරනවා.. අපි කරන කියන යම් දෙයක් වේද, එහි හොඳ හෝ නරක ප්‍රති විපාකය අපි පස්සෙන් එනවාමයි.."
"බෞද්ධ දර්ශනයේ කියවෙන දිට්ඨ දම්මවේදණීය කර්මය කියන එක මට බලපෑවෙ ඒ විදියට!.."
"මං හින්දා කවදාවත් කඳුලු සලන්න එපා..
නුඹ හින්දා මං වින්ද දුක නුඹට දැනෙනු එපා.. ඒ වේදනාව බර වැඩියි...
ඒ වේදනවා බර වැඩියි
එය නුඹට උහුලන්න බෑ..."
ඔලුව ඇතුල කම්මලක් වගේ සිතුවිලි හොල්මන් කරද්දි දමිත් අසංකගෙ හඬ මගේ කන් ඇතුලෙ දෝංකාර දෙන්න පටන් ගත්තා...මගෙ ඔලුවෙ වැඩ කලේම සයුරි එවපු මැසේජ් එක..ඉක්මණට එයා ඉන්න තැනට යන්න ඕන මම පැය එකහමාරක පරණ ප්‍රෝග්‍රෑම් එකක් අහන් ඉන්න කාරණාව මටම පැහැදිලි නෑ.. ගෙවුන දවස් කීපය තරම් මගේ ජීවිතේ කලබලකාර , පුදුම සහගත කාලයක් මම ගෙවලම නෑ..
No comments:
Post a Comment