Saturday, November 24, 2018

සුදු නංගී


දයාබර සුදු නංගී,
 මේ, මෙසේ ලියා අවසන් කරන්නට යෙදුනු කතාවක් නොවන වග විශ්වාසයෙන් කියමි.නමුත් ඔබ යා යුතුය.මුදල් බොහෝ දේ තීරණය කරනා සමාජයක විදේශයකදී හෝ ඔබ සුවෙන් සිටිය යුතුය.සුව වී ආයෙමත් මල් පාර දිග ඇවිදින්නට ඔබ පැමිණිය යුතුමය.මුකුලිත වන්නට ආසන්නයේ ඇති කැකුලු වලට හුස්ම පිඹින්නට ඔබ නැත්තේ ඇයි දැයි පිලිතුරු දී නොහැකිව අසරණ වන්නේ මා ය.ඉදින් මා ඒ සියල්ල මග හරින්නට සූදානම් වෙමි.අප ආ ගිය මග තනිව යන්නට හිතට සවියක් නොවේ.

                        රොහාන් වැනි මෘගයෙකු ඔබ වැනි සාවියක් රැක බලා ගන්නේ කෙසේදැයි අම්මා නොසිතනවා ඇති.අැයට මා කියනා දේ වැටහෙන්නේද නැත.නිරංගත් ගිහානුත් මා මගහරිමින් සිටිති.උන්ටද මේවා තේරුම් ගන්නට උවමනාවක් නැත.උත්පලා නංගීට උවද ඕනෑවට වඩා පිංසෙන්ඩු වන්නට නොහැක.

 අවසාන වතාවට ඔබේ ඔය සිනිදු කොපුල මත හාදුවක් තවරන්නටත්,ලමැද මත මුහුණ හොවා මොහොතක් සැගව ඉන්නටත් මට උවමනාය.ඔබ මෘගයෙකු අතින් තැලී පොඩි වී යා යුතු කුසුමක් නොවේ.විශ්වාස කරන්න, මේ මොහොතේ මා අසරණය.මා සතුව ඇත්තේ අපිරිමිත සෙනෙහස පමණි.

           ඒ සමුගැන්ම වෙනුවෙන් දින ගනිමි!
තුණුරුවන් සරණ


_කසුන්
               

Friday, November 23, 2018

ස්ටැන්ලි!


මචං ස්ටැනා.... එහෙමත් නැත්නම් මුඩුක්කුවෙ ස්ටැන්ලි,
උඹ මට වීරයෙක්

ආච්චිල දෙන්නෙකුත් තියාගෙන - රස්තියාදුකාර මල්ලිත් එක්ක
උඹ ගහපු ගේම් එක
ඔස්තාර්ල පරාදයි

අත ගහපු හැම #ත්තම
ඉවර වෙන්නෙ අපිට #කවෙලා

ඒ උනත්,
මැරෙනකන්  ජීවත් වෙන්න එපැයි.

පොලී මුදලාලි හොයන් එනකොට
දෙන්න ලබ්බක්වත් නැති දාක
දෙකක් ඇති වකුගඩු වලින්- එකක් වෙන්දේසි දාන්නට
කොයිතරම් උඹ අසරණද
සමාජවාදෙ අපිට වටින්නෙ රෑ පුරා පොස්ටර් ගහන්න මචං
උන්ගෙ ලබ්බවල් නෙවෙයි මේ ලෝකෙ තියෙන්නෙ
වෙනම අටමගලක් බං

හිරවෙලාම බලන්න ඕනි

යාන්තම් පණ ගැටගහගන්න - එකුස උපන් අක්කගෙ මිනිහටත් ණය වෙලා
දවස තිස්සෙ ගහපු ගේම් එක
පට්ට බං
උඹ වීරයෙක්
ඒ නිසා මට


ඔව් හැ#නෙන හැන්ඩ් බෝල් නැති ලෝකෙක ඉපදෙමු අපි ආයෙම



Thursday, November 22, 2018

අනාවැකි

ජනධිපති විසින් පාර්ලිමේන්තුව විසිරුවා හරින ලද ගැසට් පත්‍රය නීත්‍යානුකූල නොවන බව ශ්‍රේශ්ඨාධිකරණ තීන්දු කරණු ඇත.බොහෝ විට එම තීන්දුවට පෙර ජනාධිපතිවරයා විසින් ඉහත කී ගැසට්ටුව අවලංගු කරනු ඇත.එවිට පාර්ලිමේන්තු කටයුතු සුලුතර ආණ්ඩුව යටතේ තවත් අර්බුදකාරී තත්වයට පත් වනු ඇත.පාර්ලිමේන්තු ස්ථාවර නියෝග වලට අනුව ඉතිරිපත්වෙන දෝශාභියෝගයක් මගින් මහින්ද රාජපක්ෂ රජය පරාජය කරනු ඇත.
පවතින රජය දෝෂාභියෝගයක් මගින් පරාජය කර එය නීත්‍යානුකූලව සිදු වී ඇති බව ඔප්පු කල විට තව දුරටත් එම රජය වලංගු නොවේ.එසේ හෙයින් පාර්ලිමේන්තුවේ බහුතරයක් විසින් ඉල්ලා සිටි අයෙකුට අගමැති ධූරය පිරිනැමීමට ජනාධිපතිවරයාට සිදු වේ.එය මග නොහැරිය යුතු වගකීමක් වන්නේය.යම් හෙයකින් රනිල් වික්‍රමසිංහ මහතා අග්‍රාමාත්‍යවරයා ලෙස පත් කරන මෙන් බහුතර පිරිසක් ඉල්ලා සිටියහොත් ජනාධිපතිවරයාගේ ස්ථාවරය අනුව ඔහු පත් නොකරන්නේ නම් 2019 වසර මුලදී ජනාධිපතිවරණයක් පැවැත්වීමට වැඩි ඉඩ කඩ ඇත.
කෙසේ වෙතත් ජවිපය හා දෙමළ සංධානය රනිල් වික්‍රමසිංහ අගමැති වීම පිණිස බලපෑමක් නොකරන්නේ නම් අගමැති වීමේ බහුතරය පිණිස මහින්ද රාජපක්ෂ කණ්ඩායම හා එජාප පෙරමුණ අතර සීතල යුද්ධයක් ඇරඹීම අනිවාර්යය.
පවතින දේශපාලන අස්ථාවරත්වය නිසා මේ රට ඉතිහාසයේ මුහුණ දීමට නියමිත දරුණුම පසුබෑමට ලක් වීමට නියමිතය

Tuesday, November 20, 2018

උදාර ශ්‍රී ලංකා- මම හසු නොවෙමි!


උදාර ශ්‍රී ලංකා නමින් කවුරුන් හෝ පිරිසක් අන්තර්ජාලය ඇතුලෙ තමන්ගේ අනාගත වැඩපිලිවෙල,සංවර්ධන වැඩසටහන් ගැන බොහොම චිත්තාකර්ශනීය විස්තරයක් පලකරමින් තියෙනව.දේශපාලනිකව මේ රටේ බලය ලබා ගන්නෙ කොහොමද කියන කාරණාව පවා ඔවුන් සැලසුම් කරල.අන්තර්ජාලය තුල සැරිසරන,පවතින දේශපාලනික හා ආර්ථික කාරණා වලින් හෙම්බත් වෙලා ඉන්න බොහෝ අය මේ උදාර ශ්‍රී ලංකා ක්‍රියාකාරයින්ගෙ දැක්ම බෙදා හදාගන්නව.ඔවුන්ව යම් දුරකට විශ්වාස කරනව.

            බුකිය අස්සෙ තිබුණු මොකක් හෝ දැන්වීමකට මගේ අදහස පල කරපු වෙලේ මේ කියන උදාර ශ්‍රී ලංකා පිරිසෙ යම් අයෙක් මගෙත් එක්ක සංවාදයකට එනව.ඒ කතා බහෙන් පස්සෙ ඔවුගේ වට්ස්අප් කණ්ඩායම සමග එකතු වෙන විදියට ආරාධනාවක් එනව.මමත් ඉතිං ඔය කියන කණ්ඩායමට එබිල බැලුව.සාමාජිකයො දහස් ගණනක් ඉන්න ඇති.ඒ අය තමන්ගෙ දේශපාලන දැක්ම,ආර්ථික හා සමාජයීය දැක්ම ගැන කතා කරනව.නමුත් පක්ෂෙ නායකය කවුද කියල කවුරුත්ම දන්නෙ නෑ.ඒක රහසක් විදියට තියං ඉන්නෙ උපක්‍රමයක් විදියටලු.ඒ කතා බහ නිකම් හොරකමක් සැලසුම් කරනව වගේ කියල හිතුනු නිසා මං එතැනින් ඉවත් වෙනව.

          පහු කාලෙකදි මට ආයෙමත් උදාර ශ්‍රී ලංකා බුකි පිටුවෙ කවුරුන් හෝ ක්‍රියාකාරිණියක් (සංවාදය අතරතුර සිය දරුවා නිදි කරවීමට අවශ්‍ය බව කී නිසා උපකල්පනය කරමි) සමග සංවාදයක් කරන්නට අවස්ථාව ලැබෙනව.මේ බ්ලෝග් පිටුවෙම තියෙන මගේ අදහස් කීපයකට ඇය කැමති වගත් ඒවා තම කණ්ඩායමේ අදහස් විදියට ප්‍රසිද්ධ කරන්නට ඇය අවසර පතනව.මගෙන් ඒකට විරුද්ධත්වයක් නැහැ.සංවාදය දිගටම යනව... ඇය මගෙන අහනව ඇයි වට්ස්අප් කණ්ඩායමෙන් ඉවත් උනේ කියල.මං කාරණාව කියල එයාලගෙ සැලසුම මොකක්ද ඇහුව.ඒ කියන්නෙ,

1)  පහුගිය පලාත් පාලන මැතිවරණයට තරග නොකලෙ ඇයි?
2)  ඔවුන්ගේ සැලසුම පරිදි ඊලග මැතිවරණයට තරග කරල ජයග්‍රහනය නොකලොත් ඊට මුහුණ දෙන්න         දෙවැනි සැලසුමක් තියේද?
3) මැතිවරණය ජයගෙන ආණ්ඩුවක් පිහිටුවන්න තරම් බලයක් නැත්නම් සහය ලබාගන්නෙ කාගෙන්ද?


පැහැදිවම ඔවුන්ගෙ අරමුණ 2025 මැතිවරණය.සහ දෙවැනි සැලසුමක් ඔවුන්ට නෑ.පලාත්පාලන මැතිවරණයට තරග නොකලෙ ඇයි කියන ප්‍රශ්නයට මට පිලිතුරක් ලැබුණෙ නෑ.

මේ රටේ තවමත් වැඩිපුර ඉන්නෙ විචාරශීලී දේශපාලන දැනුමක් තියෙන පිරිසක් නෙවෙයි.ඒ අය මාරුවෙන් මාරුවට ප්‍රධාන පක්ෂ දෙක හෝ ඒවායෙන් බිදිල ගිය බල කදවුරු දෙක තුනක් රටේ පාලනයට ගේනව.කොයි තරම් හානිකර උනත්, බහුතර මිනිස්සු කරන්නෙ තමන්ගෙ පරම්පරාගත දේශපාලන මති මතාන්තර ඔලුවෙ තියන් පාලකයො තෝරන එක.එ හෙම නොවුන නම් සාපේක්ෂව ප්‍රධාන පක්ෂ දෙකටම වඩා යහපත් දැක්මක්  (ප්‍රායෝගික තත්වය කෙසේ උනත්)   ඉදිරිපත් කරන ජනතා විමුක්ති පෙරමුණට එක වතාවක් හරි මේ රටේ පාලන බලය යන්න තිබ්බ.ඒක එහෙම නැති නිසා හැම වෙලේම දෙවැනි සැලසුමක් තියෙන්න ඕනි.
           දෙමළ මුස්ලිම් අති බහුතරය ඡන්දෙ දෙන්නෙ ඒ අයගෙ නායකයො විදියට පෙනී ඉන්න කීපදෙනා නියෝජනය කරන සුලු පක්ෂ වලට.අලුත් පක්ෂයක් ඇවිත් බෙදාගන්නෙ මේ රටේ සිංහල ඡංද පදනම.එතකොට කොහොමත් බිහිවෙන්නෙ සුලුතර ආණ්ඩු.ඒ ආණ්ඩු තමන්ගෙ බලය රැක ගන්න අර සුලු පක්ෂ එක්ක එකගතා වලට එන එක අනාදිමත් කාලෙක ඉදන් සිද්ධ වෙන දෙයක්.උදාර ශ්‍රීලංකා කණ්ඩායමට මේ ගැටලුවට පැහැදිලි දැක්මක් නෑ.ඉතිං, අපි බලාපොරොත්තු වෙන රට ගොඩනගන්න හිතාගෙන වලකට වැටෙන්න එපා.සුලු පක්ෂ අතිශයින් අන්තගාමීයි.ඔවුන් කේවල් කරන්නෙ මේ රටේ ස්වාධීනත්වය.ඒ ස්වාධීනත්වය, ඒකීයබව නැති රටක් සුරපුරයක් කරන්න බෑ.රටේ පැවැත්ම තහවුරු කරල ඉන්න ඕනි මුලින්.
           මතවාදය සහමුලින් පිලිනොගත්තත්, ඝෝඨාභයගෙ වියත් මග කියන සංකල්පය සුපිරි.මහින්දගෙත්, එයාගෙ වටේ ඉන්න මෝඩ දේශපාලක කීපදෙනාගෙයි සමහර අණුවන වැඩ එපා වෙලා ඉන්න, නමුත් කවදා හෝ රට යහපත් විදියට ගොඩනගන්න ඕනි කියල විශ්වාස කරන උගත් පිරිස එකතු කරන් ඝෝඨාභය කරන්නෙ (දේශපාලන උප්පරවැට්ටියක් උනත්) උදාර ශ්‍රී ලංකා කණ්ඩායම ආදර්ශයට ගන්න ඕනි වැඩක්.රටවැසියා දශක ගණනක් පුරා දන්න කියන මිනිස්සු, රට පාලනය කල මිනිස්සු ඉන්න පක්ෂයකට බලය ගන්න එක උදාර ශ්‍රි ලංකා කණ්ඩායමට වඩා ඉතා පහසුවෙන් ඝෝඨාභයට පුලුවන්.ජනප්‍රිය සටන් පාඨ වලින් එහාට ගිහින් රට නිවැරදි දිශාවට ගෙනියන්න නම් පාලකයන්ව හැසිරවිය හැකි උගතුන් පිරිසක් ඉන්න ඕනි.පොහොට්ටු කණ්ඩායමට බලය අාවොත් අවංක උවමනාවක් තියෙනව නම් උගත් බුද්ධිමත් වියතුන් පිරිසක් සමග ඉන්න ඝෝඨාභයට එය පහසුවෙන් කල හැකියි.

උදාර ශ්‍රී ලංකා කණ්ඩායම මේ යථාර්ථය අවබෝධ කර නොගෙන,ඊට පිලියම් සකසා නොගෙන දේශපාලනයට ආවොත් මේ රටට වෙන මහා විනාසයක කොටස්කාරයො විතරක් වෙයි.

Tuesday, November 13, 2018

අතීතය රත්තරං

ආයෙමත් අතීත කතාවක්.... අතීතය ආයෙ ආයෙමත් සිද්ද වෙනව කියල කතාවක් තියෙනවනෙ.ඒක ඇත්ත.සමහර විට ආයෙ සිද්ද වෙද්දි සිදුවීම් වෙනස් වෙන්න පුලුවන්.නමුත් සමස්ථයක් විදියට අතීතය ආයෙ ආයෙමත් සිද්ද වෙනව..ඉතිං කතාව මෙහෙමයි....,
        පහ වසරට යනකම් මං ඉස්කෝලෙ ගියෙ ලගම නගරයේ තිබ්බ ප්‍රාථමික පාසලට.ශිෂ්‍යත්ව විභාගයෙන් පස්සෙ පහ වසරෙ හිටපු අපිට ලොකුවට උගන්නන්න ගුරුවරු මහන්සි ගත්තෙ නෑ.එක දිගට අවුරුදු දෙකක් විතර මහන්සි වෙලා ශිෂ්‍යත්වෙ ලියපු තෙහෙට්ටුව යන්නත් එක්ක එයාල එහෙම හිතන්න ඇති.ඉතිං ලැබෙන හැම ඉඩකම අපි එළියට ඇවිත් සෙල්ලම් කලා.පංති භේදයක් නැතුව හැමෝම එකතු වෙලා සෙල්ලම් කරපු එකේ  ප්‍රතිඵලය උනේ නිවාඩු දවස් වලටත් එකතු වෙලා සෙල්ලම් කරන පිරිසක් බිහි වෙච්චි එක..ගෙවල් වලින් ඉල්ලන් එන රුපියල් පහ දහය දාල පුංචි කුසලානෙකුත් අරන් කණ්ඩායම් දෙකකට බෙදිල ටවුම මැද තිබ්බ පිට්ටනියෙ නිවාඩු දවස් වලට අපි සෙල්ලම් කලා.
        මෙහෙම ටික දවසක් සෙල්ලම් කරද්දි තමයි මට තේරුණේ මං ඉන්න පැත්ත හැමදාම පරාදයි.බෝල දාන්නත් හම්බෙනව, බැට් කරන්නත් හම්බෙනව, ඒත් පරාදයි.... පස්සෙ තමයි  මං තේරුම් ගත්තෙ කණ්ඩායම් දෙක බෙදුනෙ එතන හිටි එකෙක් දෙන්නෙක්ගෙ උවමනාවට මිසක් සාධාරණ විදියකට නෙවෙයි කියල.හොදට සෙල්ලම් කරන්න පුලුවන් අය එක පැත්තකට ඇවිත් බැරි අය අනිත් පැත්තට දාල සෙල්ලම් කරද්දි පරදින එක අහන්න දෙයක්යැ 😀
            පහ වසරෙන් පස්සෙ ප්‍රාථමික පාසලේ හිටි මිතුරන් බොහෝ දෙනෙක් එක්ක උසස් පාසලට මමත් යනව.උසස් පාසලේ පංතියත් අරුම පුදුම පංතියක්.ශිෂ්‍යත්ව විභාගෙ සමත් වෙච්චි ලමයි ඔක්කොම එකට දාල හදල තිබ්බ පංතියෙ පිරිමි ලමයි තිස් පහයි.ගැහැනු ලමයි දහ තුනයි.පිරිමි ලමයින්ගෙන් ක්‍රිකට් ටීම් තුනක් හදන්න මදි උනේ එකෙක් විතරයි...හය වසරෙ ගෙවිච්ච අවුරුද්දම ගෙවුනෙ අලුතින් මුණ ගැහුණු අය අදුන ගන්න...යාලු වෙන්න..හත වසර වෙද්දි අපි ටික ඔක්කොම යාලුවො.හත වසර වෙද්දි උසස් පෙල ශිෂ්‍යයො වාර්ශිකව සංවිධානය කරන ක්‍රිකට් තරගාවලියකට අපේ පංතියෙනුත් කණ්ඩායමක් ඉදිරිපත් කරන්න තීරණය වෙනව.දැන්.. උහතෝකෝටික ප්‍රශ්නය මතු වෙනව.තිස් පහෙන් පහලවක් තෝරගන්න!
             කොහොමද මේ වැඩේ කරන්නෙ කියල කතා වෙද්දි පහ වසරෙදි සිද්ද උනා වගේ වැඩක් ආයෙත් වෙනව.කෙනෙක් දෙන්නෙක් මුල් වෙලා එයාලට වැඩියෙන්ම හිතවත් පිරිස දාල කණ්ඩායම අටවනව.මේ වැඩේට මධ්‍යස්ථව හිටපු බොහෝ දෙනෙක්ගෙ හිත සතුටු නෑ.කණ්ඩායමේ ඉන්නම ඕනි කියල විශ්වාස කරපු දෙතුන්දෙනෙක් ම එළියෙ.
             අපිට ඕනි වෙනව එළියෙ හිටපු අයටත් යමක් කමක් කල හැකියි කියල පෙන්නන්න.ඉතිං එළියෙ හිටි අය එකතු වෙලා තවත් කණ්ඩායමක් හදනව.මේක පෙරලියක් කියල දැනුන ගමන් මුලින් නම් කල කණ්ඩායමේ හිටි දෙන්නෙකුත් දෙවෙනි කණ්ඩායමට එකතු වෙනව.හරියට මේ දවස් වල දේශපාලනේ වගේ.දෙවෙනි කණ්ඩායමේ හිටි මටත් ඒක ලොකු හයියක්.දවසක් යොදාගෙන අපි දෙගොල්ලො තරගයක් තියනව.මුල් කණ්ඩායමෙන් අපට එකතු වෙච්චි දෙන්න දක්ශයො නිසා ඒ දෙන්නට තමන් කැමති තැන පන්දුවට පහර දෙන්නත් කැමති පන්දු වාරයක් යවන්නත් අවස්ථාව ලැබෙනව.මුලු ලකුණු දහය පනිද්දි අර කියපු දක්ෂයො දෙන්නම දැවී ගිහින්.වැඩක් නැති අය කියල පස්සට කරපු සමහරු කවුරුවත් හිතපු නැති තරම් විශාල පහරවල් වලින් ලකුණු ලබනව.ප්‍රතිඵලය ජයග්‍රහනය!!!
             දැන්, මුලින් දැන ඇදුනුම් කම මත තෝර ගත්තු කණ්ඩායම වෙනස් කරන්න කණ්ඩායම  තෝරගත්තු අයටම සිද්ද වෙනව.හරියන්නෙ නෑ කියල පැත්තකට කරපු සමහරුන්ට උද්දෘත ලියලම කණ්ඩායමට ඇතුල් කරගන්න අර අයට සිද්ධ වෙනව.කතාව ඕකයි.

මට මේ අතීත කතාව ආයෙමත් මතක් උනේ මේ දවස් වල මුහුණ දෙන කාරණා නිසා.........අතීතය ආයෙ ආයෙමත් සිද්ද වෙනව.සිද්දි විතරයි වෙනස්.සමස්ථය එකයි.ඉතිං මේ කතාවෙ අවසානෙ වෙනකන් මං බලන් ඉන්නව.පරදින එක,පරද්දන එක දුකක්නෙ.මං තවම පෘත:ජනයි.ඒකයි