විභාගයට හරියටම සතියක් කල් තබා සියලුම පුණරීක්ෂණ පංති නවතා දමනු ලැබීය.හදවතින්ම නැගුනු භක්තියෙන් ගුරුවරු තිදෙනාටම මම දණ ඔබා වැන්දෙමි.පළමුවර විභාගයට යන මොහොතේදී අරහං වී තිබූ විශය කරුණු බොහොමයක් ඔවුන් ගේ මගපෙන්වීම නිසා මට සරල දේවල් බවට පත් විය.
විභාගයට පෙර, දින ගණනාවක් පුරා ගමේ පංසලේ පැවැත්වූ බෝධි පුජා පිංකම් සදහා මා සහභාගී කරවීමට අම්මා දැරූ උත්සාහය සාර්ථක වූයේ නැත.විශය කරුණු හරි හැටි අවබෝධයක් නොවේ නම් බෝධි පූජාවන්වත් කොවිලේ වැඩ හිදින දෙවියන් වත් ප්‍රශ්න පත්‍ර සදහා පිලිතුරු නොලියන බව මං හොදාකාරවම දැන සිටියෙමි.ඒ නිසා දෙමව්පියන් තම දරුවන් නොයෙක් ආගමික පුද පූජා සදහා රැගෙන යන හැටි බලමින් පාඩම් කල දේවල් නැවත නැවතත් සහි කරන්නට කාලය ඉතිරි කරගන්නට සමත් වීමි.
දෙවැනි වරටත් විභාගයට මුහුණ දෙන නිසා එහි උණුසුමක් අපට දැනුනේ නැත.විභාගය ආරම්භ වීමට තිබූ විනාඩි ගණනේත් පොත්, කෙටි සටහන් වණපොත් නොකල අප සිව් කට්ටුව පාසැල් බිමේ ඇවිදිමින් සැහැල්ලුවෙන් ගත කලෙමු.පුණරීක්ෂණ පංති සදහා අපගෙන් වෙන්ව අගනුවර ඇතුලු පහසුකම් සහිත ප්‍රදේශ වෙත ගොස් සිටි මිතුරන්ද විභාගය වෙනුවෙන් නැවත පාසල වෙත පැමිණ සිටි නිසා අපට දැනුනේ නැවත පාසැල් ගියා වන් හැගීමකි.ඒ ජිවිතයට අප අසීමිතව පෙම් බැන්දෙමු.ප්‍රධාන විශයන් පැවැත්වුණු දින කිහිපයේදී පාසල වටා ඇවිදිමින් සිටි අපට ඉන්දූ, භාග්‍යා, රන්දී ඇතුලු බොහෝ අය මුණ ගැසුනු අතර පාසල් කාලයේදි මගේ කවටකම් නිසා ඇස් රතු වූ යෙහෙළියන් කිසි අයෙක් මා සමග වැඩි කතාබහක් ඇති කරන්නට උනන්දු නොවීය.වචනයක් දෙකකට වඩා කතා නොකල රන්දීගේ හැසිරීමද මට විශේෂත්වයක් වූවේ නැත.
විභාගයේ අවසානයට යෙදී තිබුණේ ඉංග්‍රීසි විශය වුවද මට එය අංඩර දෙමළයක්ම විය.එනිසාම පැය තුනක් වෙන් කර තිබූ ප්‍රශ්න පත්‍රය අවසන් කිරීමට මට ගත වූයේ පැයකට මදක් වැඩි කාලයකි.ප්‍රශ්න අතර පිලිතුරු ලිවීමට තබා තිබූ ඉඩෙහි බොහෝ සෙයින් ඉතිරිව තිබූ හිස් තැන් ගැන කණගාටුවක් මට ඇති නොවිනි.මගේ ඉලක්කය වී නිබුණේ ප්‍රධාන විශයන් තුන පමණකි.වේලාසින් පිළිතුරු ලියා අවසන් වුවද ශාලාවෙන් පිටතට යා නොහැකි නිසා නොදැනුවත්වම කල්පනාවකට වැටුනෙමි.හය ශ්‍රේණියේ සිට දුව පැන ඇවිදිමින් පාසලේ ගත කල අතීතයේ බොහෝ තැන් මට සිහිපත් විය.
"මම දැන් හුග වෙලාවක ඉදන් බලාගෙන හිටියෙ... උඩ බලාගෙන ඉන්නෙ ඔය ලමය උත්තර ලියල ඉවරද?"
මගෙ දැහැන බිදුනේ විභාග ශාලාවේ පරීක්ෂණ කටයුතු වල නිරතව සිටි ගුරුවරියක පැමිණ විමසද්දීය.
"මව් බසනෙ මිස් .., ලියල ඉවරයි"
කවදා හෝ මට හරහට හිටින්නේ තිරිංග නැති කටමය
"හා ඔහොම ඉන්නකො"
ගුරුතුමිය ආපසු ගොස් ශාලාධිපතිතුමා සමග යම් දෙයක් සාකච්චා කරනු ඇස් කොණකින් බලා සිටියෙමි.ඇය නැවත මා වෙත පැමිණියේ සිත පිනා යන ආරංචියකුත් සමගය
"සද්ද නොකර අතනට හිගින් පේපර් එක භාර දීල එලියට යන්න"
ගුරුතුමිය ආරංචිය අවසන් කරන්නටත් කලියෙන් නැගී සිටි මම උත්තර පත්‍රය ශාලාධිපතිතුමාට භාර දී ශාලාවෙන් පිටතට පැමිණියෙමි.මගේ පැමිණීමෙන් උත්තේජනය වූ බොහෝ පිරිසක් වැඩි වේලාවක් යන්නට මත්තෙන් ශාලාවෙන් පිටතට පැමිණියහ.විශය ධාරා කිහිපයකට වෙන්ව සිටි අප දෙපිලකට වෙන්ව ක්‍රිකට් ගැසුවෙමු.වරින් වර එකා දෙන්නා ශාලාවෙන් පිටතට පැමිණ අපට එක් වූ නිසා ක්‍රීඩාව නිසි ලෙස පැවැත්වූයේ නැත.අප බොහෝ පිරිසක් ක්‍රිඩා පිටිය පුරා විසිරී සිටි නිසා පලමු වර විභාගයට මුහුණදුන් පිරිසට එය අවසන් වීමේ ප්‍රීතිය නිසි ලෙස විදින්නට නොහැකි විය.ඔවුන් කලේ එකිනෙකා ජලයෙන් නහවා ගනිමින් සතුටු වීමය.විභාගය නිල වශයෙන් අවසන් වන හෝරාව ලංවන විට අපටද කරමින් සිටි ක්‍රීඩාවෙන් සතුටක් නොවුනු අතර කනිශ්ඨයන්ගේ ජල ක්‍රීඩාව වෙත යොමු වුනෙමු.
ඇද සිටි ඇදුම් තෙතබරිත වී යන තුරුම අතට අසු වූ හිස් බෝතල්, කවර ආදියයෙන් අප එකිනෙකාට ජලය ගසා ගතිමු.අඹගස් සෙවනේ හුන් ගැහැනු ලමුන් අතර ඉන්දූ ගේ මුහුණ දුටු නිසා ඔවුන්ද මගේ ජල ප්‍රහාරයකට ලක් විය.ඔවැනි අවස්ථාවක බැණුම් කප්පරක් ඇසීමට සිදු වන නිසා මා කලේ යෙහෙලියන් සිටි තැනින් මද දුරක් ඈතට යන තෙක් දිව යාමය.නමුත් ඉන්දු ඔවුන් සිටි තැනට එන මෙන් සන් කල නිසා මා නැවතත් ඔවුන් වෙතට ගියද පුදුමයකට මෙන් කිසිවෙකුත් එදින මට දොස් නැගුවේ නැත.
"රොෂාන් දැන්ම යනවද?" ඒ හඩ රන්දී ගේය
"පිස්සුද බං මුං ටික යන වෙලාවක තමයි.... ඒක නෙවෙයි., මොකද ඔය වතුර පෙරාගෙන? උඹල ඉස්කෝලෙ ඉන්නකන් මේකට වැඩක් කලේ නෑ.. දැන් මේ ඉන්න අන්තිම දවසෙත් ඉස්කෝලෙ වතුර ටිකෙන් නාගෙන යන්නෙ නේද? රෙදි හේදුවෙ නෑ? "
මිතුරියන් කේන්ති ගැන්වීම මගේ විනෝදාංශයයි!
"අනේ නෑ... පිස්සෙක් අපිව නොමිලේම නෑව්වනෙ"
"ආ... දැන් පිස්සොත් උඹලව නාවනවද... හොදයි හොදයි"
මම එතැනින් ඉවත්ව නැවත මිතුරන් හා ඒක්වීමී.
කෙසේ වෙතත් විභාගය අවසන් වී ඇති බැවින් තවත් වේලාවක් විභාග මධ්‍යස්ථානය තුල රැදී නොසිටින ලෙස ආරක්ෂක නිළධාරීන් දන්වා සිටි නිසා දුකෙන් වුවද පාසලින් පිටව යාමට සැරසුනෙමු.මා පැමිණෙන තෙක් ඉන්දූත් රන්දීත් රැදී සිටි බව දැන ගත්තේ විදුහල් ගේට්ටුවෙන් පිටතට පැමිණී විටය..
"ෂ්... ෂ්... රොෂාන් මෙහෙ එන්නකො."
යහලුවන් සමග පිටතට පැමිණි මට ඉන්දු අඩ ගැසුවේය..