Sunday, February 25, 2018

රන්දී - පියවර 15


"මේ පාර වැඩක් නෑ අම්මේ...."
එක එල්ලලේ පිලිතුරක් දීමට තරම් සිත ශක්තිමත් නැති නිසා මා සැනෙකින් කාමරයට වැදුනෙමි
"අනේ එක විශයක් වත් පාස් නැද්ද?"
අම්මා විමසිලිමත් වන ආකාරය පපුව දවාලන තරමේ විය.වසර ගණනාවක් තිස්සේ කුසට හරි හැටි ආහාරයක් වත් ගමනක් බිමනක් යන්නට ඇදුමක් වත් නොගනිමින් ඉපැයූ සියල්ල මගේ අධ්‍යාපනය වෙනුවෙන් වියදම් කල අම්මාටත් තාත්තාටත් අවසානයේ ඉතිරි වූයේ අසමත් ලෙස සටහන් කල කොල කැබැල්ලක් පමණී.අප සාමාන්‍ය පෙළ සමත් වූ දිනයනුත් අක්කා උසස් පෙළ සමත් වූ දිනයත් මට සිහි විය.ඒ දින වල අම්මාටත් තාත්තාටත්  අපෙන් තොර මාතෘකාවක් නොවීය.තුරුලු කරගෙන මුහුණ සිම්ඹේ නැති උවත්, දහස් ගණන් වටිනා ත්‍යාග නොලැබුණත් අපේ ජයග්‍රහන සමරන්නට අම්මාත් තාත්තාත් සතුටින් වෙහෙසුනු හැටි තවමත් අමතක නැත.ඒ සියලු බලාපොරොත්තු කුඩු පට්ටම් කර දමන්නට තරම් මා නොසැලකිලිමත් වූයේ ඇයි දැයි මටම සිතා ගත නොහැක.
දෑස දෙකොනෙන් කදුලු කැට ගලනවා දැනුනේ මද වේලාවක් ගත වුනු පසුය..
යහලුවනගේ ප්‍රතිඵල ගැන ඇසූ දේවලට වචනයෙන් දෙකින් පිලිතුරු දුන් මම ඇති තරම් නා ගතිමි.වතුර සමග මුසු වූ විට කදුලු පෙනෙන්නේ නැති නිසාවෙන් ගලා ගොස් අවසන් වන තුරු නිදහසේ ගලා යන්නට කදුලු වල ඉඩ දුන්නෙමි.
ප්‍රතිඵල නිකුත් වී සති කීපයක් යනතුරු ම හමුවන සියලු දෙනා විමසුවේ විභාග ප්‍රතිඵල ගැනයි.ඒ හැමට මා නොසගවා අසමත් බව පැවසුවෙමි.ප්‍රතිඵල පැමිණීමත් සමග එතෙක් නිවැරදි ඉලක්කයකින් තොරව කටයුතු කල සිතට නව පණක්,නිවැරදි ඉලක්කයක් ලැබුණි.එනිසාම අලු දූලි මතින් නැගිටින්නට ධෛර්යය ලැබුවෙමි.


*******************************************

දෙවන වර විභාගයට මුහුණ දීමට මාස දෙකක් පමණක් ඉතිරිව තිබුණත් එක දිගටම පාඩම් කටයුතු වල නිරත වී ඇති වූ මහන්සිය මගහරවා ගනු පිණිස මමත්,ගයාන්,තුෂාර,කල්ප,හර්ෂ ආදී කී දෙනෙකුම වෙසක් පොහෝ දා සවස පංසලට එක් රැස් වීමු.අවට තිබූ දන්සැල් කිහිපයකටත් සහභාගී වී සවස සූදානම් කර තිබූ බෝධි පූජා පිංකමට සංවිධාන කටයුතු වලට අපි සහයෝගය ලබා දුන්නෙමු.රාත්‍රිය ලංවත්ම බොහෝ දෙනෙක් පංසලට එක් රැස් විය.පැරණි රජවරුන්ගේ යුගයන් දක්වා ඉතිහාසයක් සහිත පංසල, ප්‍රදේශයේ බොහෝ අය නොවරදවාම පැමිණෙන තැනකි.
        පැමිණි පිරිස අතර පාසල් මිතුරු මිතුරියන්,හිතවතුන්  වැඩි පිරිසක් විය.ඒ නිසාම විභාගය ඉලක්ක කර ගනිමින් ගෙවුනු මාස කීපයේ දුෂ්කරතාව සිතින් මැකී ගියේය.අපි සියලු දෙනා බොධි පූජාවට සහභාගී වීමේ අරමුණින් බෝධි ප්‍රාකාරය අසල රැදෙමින් සිටියෙමු.ස්වාමීන් වහන්සේ බෝධී පූජාව ඇරඹීමට මද වේලාවකට පෙරාතුව හාත් පස දුවමින් සිටි මගේ දෑසට හුරු පුරුදු නෙත් සගලක් ගැටුනත් ඒ කවුදැයි හරි හැටි හදුනා ගැනීමට ඈ අප අසලටම පැමිණෙන තෙක් හිදින්නට සිදු විය.තනි කරලට ගෙතූ මුදු ගැසුනු කෙස් කළඹත් චාම් ඇදුමත් නිසා සිත උමතු කරවන තරමේ සුන්දරත්වයක් රන්දී ගෙන් දිස් විය.
"හම්මට උඩු... මේකි තවත් ලස්සන වෙලානෙ... මට අදුන ගන්න බැරි උනා.... "
ඉන්නේ කොහිදැයි අමතක වුනු නිසා කට ක්ෂණිකයෙන් ක්‍රියාත්මක විය.
"ම්... හුග කාලෙකින් දැක්කෙ.. ඉතිං කොහොමද ඔයාලට? එග්සෑම් එකෙන් පස්සෙ දැක්කමද කොහෙද..."
"ඒකනේ... අපි ඉතිං සැපට දුක් විදිනව.. උඹලට කොහොමද? ආතල්ද? ගයාන්ද කතාවට හවුල් විය.."
වැඩි වේලාවක් යන්නට මත්තෙන් බෝධි පූජා පිංකම ආරම්භ වූයෙන් සියල්ලන්ම හුන් තැන සිටම එයට සහභාගී විය.රන්දීටද සිදු වූයේ සෙනග මැදින් දෙමව්පියන් වෙත නොයා අප සමග රැදෙන්නටය.පූජාව අවසන් වන තුරු අප කලේ රහසින් ආ ගිය තොරතුරු කතා බස් කිරීමයි.
ඇය නැවත දෙමව්පියන් වෙත යන්නට කලියෙන් අප සියලු දෙනාගේම දුරකතන අංක ඇගේ නවීන ජංගම දුරකතනයට ඇතුලත් කරගන්නට විය.

"ඔයාලට බැරි නම් අපිවත් කතා කරන්න ෆෝන් නම්බර් එක දෙන්න තුෂාර.."
"ඔන්න දා ගනින්... බිංදුවයි...."
රන්දීගේ දුරකතන අංක පෝලිමේ අන්තිමයා මම විය.මිතුරන් තමන්ගේ ජංගම දුරකතන අංකය හෝ එවැන්නක් නොමැති අය නිවසේ දුරකතන අංකය හෝ ඇයට ලබා දුන්නෝය.
"රොෂාන් ...ඔයාගෙ නම්බර් එක...?"
"මට මොන ෆෝන් ද බං... පණිවිඩයක් තියේ නම් පොලීසියට කියපං.උන් තත්පරෙන් මට දෙයි"
ඇගේ මුහුණ ක්ෂණිකයෙන් අදුරු වූ යේ ලැජ්ජාවටද එසේත් නැත්නම් වරදකාරී හැගීමෙන්දැයි දන්නේ නැත.
"එක්ස්ට්‍රීම්ලි සොරි රොෂාන්.....මට එඩ්‍රස් එක දෙන්නකො..."
සිහින් ස්වරයෙන් පැවසූ ඇය දුරකතනයේ යතුරු කීපයක් වේගයෙන් ඔබමින් මගේ ලිපිනය ඊට ඇතුලත් කර ගත්තාය.

සවස් යාමයේ පංසලේ ගත කල පැය කීපය නිසා මගේ හිත තරමක් නොසන්සුන් විය.පාඩම් කරන්නට තරම් සිත ට නිදහසක් නැති වූ නිසා ගුවන් විදුලියෙන් ප්‍රචාරය වන පිරිත් දේශනාවට කන් යොමා සිටියෙමි.පිරිත් දේශනාව පැය කිහිපයක් ගත වන තුරු ගත වන කාලය ගැන අවධානයක් නොවීය.
රාත්‍රි යේ දී මම ගෙමිදුලට පැමිණියෙමි.පසලොස්වක සද නිසා වැඩි අදුරක් පරිසරයේ නැත.සීතල සුලගත් සමග මුසුව ආ පිච්ච මල් සුවද සිත තවත් කළඹන්නට විය.කෙතරම් නවතාලන්නට උත්සාහ කලත් සිත දිව යන්නේ සවස් යාමයේ දුටු නිල් දෑස සොයන්නටය..කිසි ලෙසක හැබෑ නොවෙනා හීනයක අතරමං වන්නට සිත වෙහෙසෙන අපූරුව!


Thursday, February 22, 2018

රන්දී - පියවර 14

"අනේ පව් පොඩි පුතා.. ගෙදරට වෙලා ඉන්න ටිකේ වවපු දේවල් විකුණල අද අතට ගානක් හොයා ගෙනනෙ"

වැඩ අවසන් වී හැන්දෑවේ ගෙදරට පැමිණි තාත්තාට අම්මා කියනවා එළිපත්තේ සිටි මං අහගෙනය
 "අනේ වාසනාවන්... පොඩි කමට ඉන්නෙ නැතුව පුතත් කීයක් හරි හම්බකරන එක ලොකු දෙයක්..ඒ ලමයින්ටත් වියදම් තියෙනව නැතෑ.."

අම්මාත් තාත්තාත් මා ගැන ප්‍රශංසනාත්මකව කතා කිරීම මගේ සතුට වැඩි කරන්නට විය...

නිවසටම වී හිදීම කම්මැලි වූ තැන තුෂාර හෝ ගයාන්ගේ නිවසට යාමට මම පුරුදු වුනෙමි.දිනක් සවසක මා ගයාන්ගේ නිවසට යනවිට ඔහුගේ පියා නිවස ඉදිරියෙන් ඇති පිහිඹියා සෙවනේ වූ බංකුව මත සිටිනු හමු විය.
 "විජේ මාමෙ.. ගයාන් ගෙදර ඉන්නවදැ" යි අසමින්ම මා ඔහු වෙත ගියෙමි
"ආ..මේ රොෂන් පුතානෙ..මං හිතන්නෙ පුතා නානව.එතතකන් ඇවිත් ඉදගන්න...."    කියවමින් සිටි පුවත් පත පසෙකට කර ඔහු මටද බංකුවේ ඉඩ සෑදුවේය.
ව්‍යාපාරිකයෙක් වූ ගයාන් ගේ පියා බොහෝ විට සවස් වරුවේ නිවසේ රැදේ.උදෑසන ව්‍යාපාරික ස්ථානයට ගොස් දෛනික කටයුතු අවසන් කරන ඔහු නැවත එතැනට යන්නේ එය වසා දමන වේලාවටය.ඔහු නොරැදෙන වේලාවන් වලදී ව්‍යාපාර කටයුතු කරගෙන යෑමට විශ්වාසවන්ත සේවක මණ්ඩලයක් පුහුණු කර ගන්නට දශක ගණනක් පැරණි වූ ඔහුගේ ව්‍යාපාරික ඤාණයට හැකි වී ඇත.
"කොහොමද පුතේ ඉතිං... දැන් ආයෙම පංති යනවද?"
"තවම නෑ මාමෙ.. ප්‍රතිඵල ආපුවමම යනව.."
අග හිගකම් නිසා පංති යෑම සීමා කරන්නට මං අධිශ්ඨානයෙන් සිටිනා වග පවසන්නට තරම්  සිතට ධෛර්යයක් උපද්දවා ගන්නට නොහැකි විය.
"අපේ කෙනා නම් ඔන්න පටන් ගත්තු දවසෙ ඉදන් දෙවෙනි පාර කරන්න කියල පංති යනව...ප්‍රතිඵල එන්නත් තව වැඩි කාලයක් නෑ මයෙ හිතේ.."
"ඔව් මාමෙ මමත් අහගෙන ප්‍රතිඵල ලගදිම එනව කියල ප්‍රවෘත්ති වලට කියනව..මට නං ඉතිං ඕක ආවත් එකයි නැතත් එකයි.."
"ඒ මොකද පුතේ.?."
"වැඩක් නෑ මාමෙ, මේ පාර නම් අනාගත්ත හොදටම"
"ම්... එහෙම කියල උත්සාහය අතාරින්න එපා පුතා..ඒ වතාවෙ බාරි නම් ඊලග වතාවෙ හරි වැඩේ කරන්න.මේ ලෝකෙ මිනිස්සු දියුණු වෙලා තියෙන්නෙ උත්සාහ කරපු පලවෙනි අවස්ථාවෙන්ම නෙවෙයි."
"ඒක නම් ඇත්ත මාමේ.. මේ පාර ට්‍රයි කරනව උපරිම"
"ඒයි රොෂාන් ... වැඩපන් මෙහෙට!"
නෑමෙන් පසු ඉනේ දවටා ගත් තුවාය සමග ජනෙල් කූරු අතරින් පෙනී සිටි ගයාන් කෑ ගැසුවෙන් එ් දෙසට යන්නට නැගී සිටියෙමි.
"මොකෝ උඹ කාලෙකින් නාල හෙම? කවුරුවත් PHI එනව හෙම කිවුවද?"
"අනේ මේ ... කට වහපං .. ගෙදර නොවුන නම් මං කියල දෙනව තොට කවුද එන්නෙ කියල"
"ඒක නෙවෙයි.. කොහෙද උඹ ගියේ?"
"කොහෙවත් නෑ බං.. නිකමට මේ පැත්තෙ ආවෙ.. පංති ටික අහගෙන යන්නත් එක්ක.. ලබන සතියෙ ඉදන් වත් එන්න කියල හිතං ඉන්නෙ."
ඔහුගෙන් අසා දැන ගත් පුණරීක්ෂණ පංති සදහා ඊලග සතියේ සිට මම සහභාගී උනෙමි.ඒ සියලු පංති පැවතියේ සතියේ දින වල නිසා පාසැල් කාලයේදී සහභාගී වූ උපකාරක පංති වලට වඩා පහසුවක් අත්විදින්නට හැකි විය.වගාවෙන් ලද මුල් ආදායමෙන් ම පංති ගාස්තු ගෙවන විට මට මහත් ආඩම්බරයක් ඇති විය.සෑම පංතියකදීම පාසැල් මිතුරන්ගෙන් උණූසුම් පිලිගැනීමක් මා වෙත හිමි විය.
 පුණරීක්ෂණ පංති ගමන ආරම්භ කර දෙවැනි සතිය වන විට උසස් පෙළ ප්‍රතිඵල නිකුත් විය.බොහෝ අය නගරයේ අන්තර්ජාල සේවා සපයන ස්ථාන වල පෝලිම් සැදී තමන්ගේ ප්‍රතිඵල දැන ගන්නට උත්සුක විය.සමහරු ප්‍රතිඵල සටහන දැක කදුලු සලද්දී තවත් සමහරු උසස් ලෙස සමත් වීමේ ප්‍රීතිය නිසා කදුලු සලන්නට විය.මට මා බලාපොරොත්තු වූ ප්‍රතිඵලය එලෙසම ලැබී තිබුණි.ප්‍රතිඵල ලැබෙන තාක් ලැබෙන ප්‍රතිඵලය ගැන අවබෝධයෙන් සිටියත් ප්‍රතිඵල සටහනේ සමත් ලෙස සටහන් වී ඇත්නම් කෙතරම් අගේ දැයි සිතින් ප්‍රාර්ථනා කලෙමි.නමුත් අස්වැන්න ලැබෙන්නේ වැපිරූ හැටියට මිස වෙන යම් ක්‍රමයකට නොවේ.

  සියලු විශයන් අසමත් ලෙස සටහන් වූ පත්‍රිකාවත් සමග මා මොහොතකට අතරමං වීමි.පසුගිය කාලයේ මා විසින් ගත කල ජීවිතය නොවන්නට මේ සටහන වෙනස් වන්නට තිබූ බව මා අවබෝධ කරගතිමි.කෙසේ උවද දැන් ඒ ගැන සිහිකර දුක් වීමෙන් පලක් නැත.ඉදිරියේදී මෙවැනි අපහසුතාවයකට මුහුණ නොදීමට කටයුතු කිරීම හැර වෙනත් යමක් ඉතිරි නැත.
  මෙවර විභාගයෙන් අසමත් උවද සතුටු විය හැකි කාරණා බොහොමයක් විය.ඒ එක බඩවැල කඩාගෙන ආ සහෝදරයන් මෙන් පාසලේදී උන් මිතුරන් බොහෝ දෙනෙක් තමන්ගේ කඩයිම ජයග්‍රහනය කර උසස් අධ්‍යාපනය වෙනුවෙන් සුදුසුකම් ලැබීමයි.තුෂාර එස් සාමාර්ථ දෙකක් සහ සී සාමාර්ථයකුත් ගයාන් එස් සාමාර්ථ තුනකුත් ලබා තිබුණි.සහන් විශයන් දෙකකට පමණක් එස් සාමාර්ථ ලබා අනෙක් විශය අසමත් වී ඇත.
මිතුරන්ගේ ප්‍රතිඵල ත් අනෙකුත් පාසල් වලින් විශිෂ්ඨ ලෙස සමත් වූ අයගේ විස්තර ආදිය කතා කරමින් සිට මා නිවෙසට යන විට රාත්‍රිය උදා වන්නට තිබුණේ අඩ පැයකටත් අඩු කාලයකි.ඒ වන විටත් අම්මාත් අක්කාත් මග බලා සිටියේ මගේ ප්‍රතිඵල දැනගන්නටය
 "කොහොමද පුතේ... පාස්ද?" නිවසට ගොඩ වන විටම අම්මා උනන්දු විය

Wednesday, February 21, 2018

සිත නිවන කතා

මං ආසයි..ආයෙත් 
ඒ ජීවිතයට යන්න ඇත්තන්
පුදුම සැහැල්ලුවෙන්
හිත ලගින් සැතපී
අවනඩුව අහන්නට උඹ උන්නු අතීතය .
හැගීම්බරයි
බොහෝ දේ පසු කරන් කාලය ඉගිලුනත්
බොලදකම එහෙමමයි
මැරෙණකන් ඉටු නොවෙන!


Wednesday, February 14, 2018

රන්දී - පියවර 13

දිනය උදා විය.අපේ මුලු ජීවිතයම තීරණය කරන දවස උදා විය.මා වෙනදාට වඩා වේලසනින් අවදි වී හැගෙන හදින් යුතුව සූදානම් උනෙමි.නිවසින් පිට වීමට මත්තෙන් අම්මාටත් තාත්තාටත් අක්කාටත් දණ ඔබා වැන්දෙමි.නමුත් සිතට අඩුවක් දැනේ.වසර තුනකට ආසන්න කාලය තුල පාසලේත් ටියුෂන් පංති තුලත් කල කී දෑ විදුලි කොටන්නාක් මෙන් සිත තුල ඇති වී නැති වී යයි.මා විභාගයට යන්නේ ඉන් ලැබෙන ප්‍රතිඵල පිලිබදව හරි හැටි දැනගෙනය.පෑනකුත් පැන්සලකුත් ගෙන නිවසින් පිටත් වුනෙමි.ජීවිතයේ හැම ගමනටම වාරු දුන් පා පැදිය ට බර දී නගරයට යන අතර මග මුණගැසුනු බොහෝ දෙනෙක් විභාගයට සුභ පැතුවෝය.
            පාසල් බිම සොහොන් ගෙයක් මෙන් නිහඩය.එකා දෙන්නා තැනින් තැනට වී පොත් පෙරලමින් පාඩම් කරනු පෙනේ.යහලුවෙකුගෙන් පොතක් ඉල්ලා ගත් මා විභාගය ඇරඹෙන තුරු නොතේරෙන සමීකරණ හා සූත්‍ර සමග අතරමං වුනෙමි.
          විභාගය පැවති දින කීපයම එක වාගේය.හරි හැටි කෑමක් බීමක් නොගෙන එක දිගට පාඩම් කලද ප්‍රශ්න පත්‍ර සමග ගනු දෙනුව මට මහත් අභියෝගයක් විය.දැන් ඉතිං කල හැක්කක් නැත.දෙවැනි වතාවේ මෙවැන්නක් සිදු නොවන්නට කටයුතු කරන බව මා මටම සපථ කර ගත්තේ විභාග ශාලාවේදීමය.මට ඇති ලොකුම ප්‍රශ්නය අනේක විද දුක් විදිමින් අම්මාත් තාත්තාත් මා වෙනුවෙන් විය පැහැදැම් කල මුදල් ගගට කැපූ ඉණි බව දැන ගත් විට ඔවුන් ට මුහුණ දීමයි.මං මහා අපරාධකාරයකු බව මට හැගේ.
     අවසානයට යෙදුනු ප්‍රශ්න පත්‍රයටත් පිලිතුරු ලියූ අප විභාග ශාලාවෙන් පිටතට ආවේ තාව කාලිකව හෝ ලැබුණු සහනය ගැන උදම් වෙමිනි.මේ පාසල් නිල ඇදුමෙන් සැරසී ජීවිතයේ සුන්දරතම මතක පිරි ආදරණීය පාසලට එන අවසාන දිනයයි.අප සියල්ලන්ටම පාසල හැරදා යන්නට නොහැකි සෙයක් දැනේ.අදින් පසු සමහර මිතුරන් යලි කෙදිනක දකී දැයි දන්නෙ නැත.වෙනදා විශේෂත්වයක් නොදුටු පාසල් ගොඩනැගිලි අද පෙනෙන්නේ අපගේ නික්ම යාමට සොවින් මුහුණු අදුරු කරගෙන ආකාරයකි.සහෝදර සහෝදරියන් ලෙස ලගින් සිටි බොහෝ දෙනෙකුගේ දෑසට කදුලු නැගී ඇත.පාසල් ජීවිතයේ අවසාන දිනය ඉක්මණින් අවසන් කිරීමට අප කිසිවෙකුටත් අවැසි නොවීය.
     මිතුරන් ට සුභ පතමින් සමරු සටහන් ලබා ගනිමින් පාසල පුරා ඇවිද ගිය මට අඹ ගස් වෙනට වී කතා බස් කරමින් සිටි යෙහෙලියන් පිරිසක් මුණ ගැසුනි.පාසලෙන් නික්මේනට කලියෙන් ඔවුන්ටද සුභ පැතීමේ අදහසින් මා ඔවුන් වෙත ගියෙමි.උසස් පෙල සදහා වෙන වෙන විශයන් හැදෑරුවද එතැන නිශානි, සකුන්තලා,රන්දී,ඉනිදු ඇතුලු පිරිසක් විය.
මොකෝ තවම උඹල ගෙවල් වලට නොගියෙ?
අද නම් යන්න බෑ වගේ... සකුන්තලා හඩන්නට ආසන්නය
ඉතිං නිශානි මොකෝ කරන්නෙ ඉස්සරහට... එකපාරෙන් ගොඩ යන්න පුලුවන් වගෙද...
 මාතෘකාව වෙනස් කරන්නට මං  නිශානි වෙත හැරුණි
මොන ගොඩ යෑම්ද රොෂාන් .... මං මේ ආයෙ පාරක් කරන්න ලෑස්ති වෙනවා..ඔයා නම් ඉතිං ගොඩ නේද?
හම්මේ තමයි... කැම්පස් පාටි එක දෙන දවසට උඹ අනිවා වරෙන් ආ... මගේ තරම දන්නේ මම පමණකි
ඒක නෙවෙයි.. අන්න කොල්ලො සෙට් එකත් යන්න හදන්නෙ.. යමං... මම නැගී සිටියෙමි

ඉතිං...ආයෙ කවද කොහොම හම්බවෙයි ද දන්නෙ නෑ.. කොහොම උනත් දැක්ක තැනකදි කතා කරල පලයල්ල. හරී!

මගේ වදන් අඩන්නට සිටි ඇස් වලට ඇගිල්ලෙන ඇන්නා  විය.අත් ලේන්සු වලින් පිසදමන්නට කලියෙන් යෙහෙලියන්ගේ දෑස් වල නැගුනු කදුලු කැටි මං දැක්කෙමි.මිතුරන් වෙත යන්නට කලියෙන් ඒ සියල්ලන්ට මා සමු දුන්නෙමි.

පාසල් පංති කාමර පෙලත් ගේට්ටුවත් අතර දුර ගෙවා දමන්නට අපට අඩ පැයක්වත් යන්නට ඇත.නවතිමින්,සිනා සෙමින්,අඩමින්, වැලද ගනිමින් අප ඒ දුර ගමන් කලෙමු.පාසලෙන් පිට වන්නට පා එසවෙන්නේ මන්දගාමී ලෙසිනි.පාසලෙන් බස් නැවතුම් පලට පැමිණි අප එතැනද පැයකට වඩා කාලයක් ගත කලෙමු.නැවතත් නැවත නැවතත් සියලු දෙනා වැලද ගනිමින් අප සමුගත්තෙමු.නිවසට යෑමට බස් රථයට නැගුනත් මිතුරන් හැර දමා යාමට සිත් නොවේ.ජීවිත කාලය පුරාවට හරි හම්බ කල ගත් එකම ධනය ඒ මිතුරු කැලයි.

******
විභාගය අවසන් වී ගෙවුනු පලමු සතිය තුල හොද හැටි නිදා ගත්තෙමි.දෙවැනි සතිය ඇරඹෙත්ම උසස් පෙල පුණරීක්ෂණ පංති ආරම්භ වන බව දැනගන්නට ලැබුණත් ඒවාට සහභාගී වෙන්නට අම්මාගෙන් මුදල් ඉල්ලීමට තරම් සිතට ධෛර්යයක් නොවීය.කෙසේ වෙතත් සමත් වීම සදහා අනිවාර්යයයෙන්ම නැවත වරක් විභාගය ට පෙනී සිටිය යුතු බව මා අවබෝධයෙන් දැන සිටියෙමි.එනිසා අනාගතයේදී  ප්‍ර යෝජනය වනු ඇතැයි සිතා නිවස අවට එළවලු වගාවක් ඇති කලෙමි.ඉඩ ලැබෙන වේලාවල් වලදී ටියුෂන් පංති වලින් ලැබී තිබුණූ ප්‍රශ්න පත්‍ර වලට උත්තර ලිවීමට උත්සාහ කලෙමි.ගැටලු මතු වන තැන් වලදී ලියා ගෙන තිබූ සිද්ධාන්ත පොත් පෙරලමින් අවබෝධ කර ගන්නට පටන් ගත් නිසා යම් දියුණුවක් ඇති වන බව මටම හැගී ගියේය.

වගා කර මාස දෙකක් තුනක් ගත වන විට සැලකිය යුතු ඵලදාවක් ලබා දෙන්නට මෑ කරල් පාත්ති කීපයට හැකි විය.නිවසේ පරිභෝජනයට කොටසක් තබා ඉතිරිය විකුණා ගන්නට සමත් වීමි.එය මට මෙන්ම නිවසේ සැමට සතුටුදායී දිනයක් විය.


Sunday, February 11, 2018

හැරවුම

අද එනම් 2018 පෙබරවාරි මස 11 වැනිදා ශ්‍රී ලාංකික දේශපාලනයේ සුවිශේෂි දිනයක්.2015 ජනාධිපතිවරණයෙන් මහින්ද රාජපක්ෂ එවකට හිටි ජනාධිපතිවරයා පරාජයට පත් කර වෙනසක් මූලික කර ගනිමින් ඇරඹුණු දේශපාලනික ගමන වසර 3 කට පසු සහමුලින්ම පරාජයට පත් කරන්නට මේ රටේ බහුතර ජනයා සමත් විය.
                     මහින්ද රාජපක්ෂ ජනාධිපතිවරයා පරජය වන්නට එවකට ඔහුගේ රජයේ සිටි මැති ඇමතිවරුන්ගේ ක්‍රියා කලාපය සේම රටේ පොදු ජනයාට අත පොවන්නට නොහැකි මානයක සිට ක්‍රියාත්මක වූ බලවේගයක්ද ඉවහල් වූ බව බැලු බැල්මට පෙනෙන්නට විය.හුදෙක්ම මහින්ද රාජපක්ෂ ජනාධිපතිවරයාගේ පරාජයට සෘජුවම බලපෑම් කලේ උතුරු නැගෙනහිර සුලු ජාතික ඡන්දයි.එතැනින් පසු නොයෙක් අවලාද මැද 2015 වසරේම පැවැත්වුනු මහ මැතිවරණයෙන් මහින්ද රාජපක්ෂ නායකත්වය දෙමින් තරග වැදුනු එක්සත් ජනතා නිදහස් සංධානයට හෝ එක්සත් ජාතික පක්ෂයට බහුතර බලයක් ලබා ගැනීමට නොහැකි වුවද එජාපයට වැඩි වාසි අත්කර දෙන්නට සමත් විය.එසේම අවසන් මොහොතේදී ජනාධිපතිවරයා විසින් සිදු කරන ලද ප්‍රකාශයන්ගේ හා සංධානයේ ප්‍රධානියා ලෙස සිදු කරන ලද නිලතල හුවමාරුවේ අවාසිය නිසා මහින්ද රාජපක්ෂ ප්‍රමුඛ සංධානයට පරාජය වැලද ගන්නට සිදු විය.
          එතැනින් පසු පරාජිත පක්ෂ වලින් පිල් හුවමාරු කල පිරිස සමගන් එජාපය ප්‍රමුඛව ආණුවක් පවත්වාගෙන ආවද සමස්ථ මහජනයාට අත්විදින්නට සිදු වූ  දැඩි ආර්ථික අපහසුතා හා සමාජයීය, දේශපාලනික කරුණු මුල් කරගනිමින්  වසර කීපයක් ප්‍රමාද කරමින් පැවැත්වූ පලාත් පාලන ආයතන ඡන්ද විමසීමෙන් රජයට පැහැදිලි රතු එළියක් දල්වන්නට මහින්ද රාජපක්ෂ සමගින් හුදකලාව තරග වැදුනු ශ්‍රී ලංකා පොදුජන පෙරමුණට හැකි වී තිබේ.මෙම මැතිවරණයේ දැවැන්තම අභියෝගය ලැබුවේ පොදුජන පෙරමුණයි.රටේ අනිකුත් ප්‍රධාන දේශපාලන පක්ෂ සියල්ල එකම කදවුරක සිට වෙන වෙනම තරග වැදුනු අතර ඒ සියල්ලට තනිව මුහුණ දෙමින් ජයග්‍රහනය කිරීමේ අභියෝගය ඔවුන් වෙත එල්ල විය.එසේම මෙම මැතිවරණයෙන් පැහැදිලි යමක් සිදු කල නොහැකි වූයේ නම් එයම මහින්ද රාජපක්ෂගේ දේශපාලනය අවසන් කිරීමට තරම් තත්වයක් ගොඩනැගෙමින් තිබිණ. නමුත් පීඩනය පුපුරා යවමින් බහුතර ජනතාව මහින්ද රාජපක්ෂ පිලිබදව තම විශ්වාසය තහවුරු කර පැහැදිලි ජනමතයක් ලබා දෙමින් ඇත.බොහෝ පලාත් පාලන ආයතන වල 50%කට වඩා ඡන්ද ප්‍රතිශතයක් ලබා ගනිමින් පාලන  බලය ලබා ගැනීමේ අපහසුතාවයට මුහුණ දීමට ජයග්‍රහනය කල පක්ෂ වලට සිදු වන්නේ නව මැතිවරණ ක්‍රමයේ අඩුපාඩු නිසාවෙනි.
            දැන් දැන් නිකුත් වන ප්‍රතිඵල නිසාවෙන් තිගැස්සීමට ලක් වූ ආණ්ඩුවට සහයෝගය දක්වන පසුගිය මහ මැතිවරණයෙන් එක්සත් ජනතා නිදහස් සංධානය යටතේ තරග කල ඇමති වරුන් මහින්ද රාජපක්ෂ හිටපු ජනාධිපතිවරයා හමුවෙමින් නැවතත් පිල් මාරුවකට සූදානම් වන බව ආරංචි ගලා එමින් ඇත.
         මෙම මොහොතේ ජනාධිපති මෛත්‍රී සිදුකල යුත්තේ ඔහු ජනාධිපති පුටුවේ හිදවූ ලක්ෂ 62ක් වූ ජනතාවගේ අභිලාෂයට කන් දෙමින් ශ්‍රී ලංකා නිදහස් පක්ෂයේ සභාපතිකම වෙනත් අයෙකුට ලබා දී නිර්පාක්ෂික වීමයි.එවිට ශ්‍රී ලංකා පොදුජන පෙරමුණ හා ශ්‍රී ලංකා නිදහස් පක්ෂය ප්‍රමුඛ සංධානයට එක් විමට බාධාවක් ඇති නොවේ.අවසානයේ ශක්තිමත් ලෙස පාලාත් පාලන ආයතන වල බලය පිහිටුවිය හැක.ඒ හැර වෙනත් ඕනෑම විකල්පයකින් සිදු වන්නේ වර්ථමාන රජයට එරෙහි ජනතා බලවේගය කැරැල්ලක් බවට පත් වීම පමණි.
   

Wednesday, February 7, 2018

කරනව නම්..








පලමු රාජකාරිය 

  • රාජ්‍ය සේවයේ හෝ අර්ධ රාජ්‍ය සේවයේ නිරත පුද්ගලයන් විසින් සිදු කර ඇතැයි පැවසෙන ඕනෑම දූෂණයක් වංචාවක් හෝ අවභාවිතාවක් පිළිබදව කඩිනම් පරීක්ෂණ පැවැත්වීමට හැකි වන පරිදි රාජ්‍ය සේවා කොමිසම බල ගැන්වීම හා අවශ්‍ය කරන භෞතික හා මානව සම්පත් ලබා දීම.ඊට අදාල සියලුම නීත්‍යානුකූල කටයුතු එම කොමිසමට පැවරීම හා ඒ වෙනුවෙන් අවශ්‍ය කරන නීති රාමුව කඩිනමින් සැකසීම.රජයේ දේපල වංචා කර ඇති ඕනෑම අයෙකු එම චෝදනා සාධාරන සැකයකින් තොරව කොමිසම හමුවේ ඔප්පු උවහොත් අදාල පුද්ගලයා රාජ්‍ය සේවයෙන් නෙරපා හැර විශ්‍රාම වැටුප් හෝ වෙනයම් දීමනා වෙතොත් ඒ සියල්ල අතිහිටුවා වංචාව සිදු කල දින සිට වෙළදපල පොලී අනුපාත යටතේ ගෙවන දින දක්වා පොලී මුදල් එකතු කිරීම හා එය මුදලින් ගෙවා දැමීමට අපොහොසත් වේ නම් ඔහු හෝ ඇය සතු හෝ පවුලට අයත් උපයා ගත් ආකාරය සනාථ කල නොහැකි දේපල විකුණා අය කර ලැනීමට කටයුතු කිරීම.අයකර ගැනීමට හැකි වන්නේ අදාල මුදලින් කොටසක් නම් ඉතිරි මුදලටත් සිදු කල දූෂණයටත් එරෙහිව නීත්‍යානුකූලව දිය හැකි උපරිම දඩුවම් ලබා දීම
  • රටේ සියලුම ග්‍රාම සේවා වසමකටම පුරප්පාඩුව පවතින ග්‍රාම නිළධාරීන් හා කෘෂී උපදේශකවරුන් තරග විභාග පවත්වා හැකි ඉක්මණින් බදවා ගැනීම
  • ග්‍රාම නිළධාරීන් හා කෘෂි නිළධාරීන් හරහා අදාල කොට්ඨාශය තුල පවතින වගාවන්,මුඩු ඉඩම්,දිය උල්පත් හා ඇල මාර්ග, වැව් අමුණු ගංගාවන් ගොවිපලවල් හා කැලෑවන් පිලිඹදව නිවැරදි සංගණනයක් සිදු කිරීම
  • රජයට හෝ රජයේ ආයතන වලට අයත් ඉඩම් පිලිබදව නිවැරදි විස්තර ගැසට් කිරීම.එම ගැසට් පත්‍ර යෙන් පසු රජයේ ඉඩමක සිදු කරන අනවසර ඉදිකිරීම් හෝ වගාවන් වේ නම් සියල්ල ඉවත් කිරීම
                                                           මේ සදහා තමන්ට අයත් ග්‍රාම නිළධාරී වසම තුල ග්‍රාම නිළධාරීවරයා                කෘෂි කර්ම නිළධාරීවරයා සතියේ එක් දිනක් අනවාර්ය ක්ෂේත්‍ර චාරිකා සිදු කරවීම.අනවසර ගොඩනැගිලි හෝ වෙනත් අනවසර ක්‍රියාවන් පිලිබදව අදාල වගකිවයුත්තන් වෙක දැනුම් නොදෙන නිළධාරින් සේවය පැහැර හැරියා ලෙස සලකා සේවයෙන් පහ කිරීම

  • රජයේ ආයතන සතු රක්ෂීත වනාන්තර හා අභය භූමි නැවත මැනුම් කටයුතු සිදු කර විවිධ පුද්ගලයන් විසින් ඒවා අත්පත් කරගෙන ඇතිනම් සියල්ල විනාශ කර දමා නැවත වනාන්තර ඇති කිරීම.ඒ වෙනුවෙන් හා රක්ෂිතයන් පාලනය කිරීම සදහා මානව සම්පත් හිග නම් විශේෂිත වැටුප් ක්‍රමයක් හදුන්වා දී එම වනාන්තර අවට  අපොස සාමාන්‍ය පෙල සමත් පිරිස සේවයට බදවා ගැනීම.දැනට පයිනස් වගා කර ඇති සියලුම භූමි වල එම වගාවන් ඉවත් කර වනාන්තර ඇති කිරීම.
  • දැනට රජයේ ඉඩම් වල අනවසරයෙන් පදිංචි අයවලුන් වහාම ක්‍රියාත්මක වන පරිදි ඉවත් කිරීම.යම් ආර්ථික අපහසුකම් සහිත පුද්ගලයන් වේ නම් ඔවුන් සදහා මහල් නිවාස ලබා දීම.එම අයගෙන් නීරෝගී පුද්ගලයන් වේ නම් සතියේ එක් දිනක් මහල් නිවාස ඉදිකිරීම් කටයුතු වෙනුවෙන් සේවය ලබා ගැනීම.
  • දේශීයව මෝටර් රථ නිශ්පාදනය කරන සමාගම් සදහා ආදායම් බදු 50%කින් ඉවත් කිරීම.දේශීයව ප්‍රමිතියට අනුකූලව නිපදවන කුඩා මෝටර් රථ නිශ්පාදකන් දිරිගැන්වීම සදහා ආනයනය කරනු ලබන එම කාණ්ඩයේ වාහන සදහා ආනයනික ගාස්තු ඉහල දැමීම.
  • දේශීය කර්මාන්ත කරුවන්ගේ නිශ්පාදන අපනයනය කිරීමේදී සියලුම රජයේ බදු කපා හැරීම
  • කොළඹ නගරය වෙත ප්‍රවිශ්ඨ වන මංකඩවල් වන මොරටුව හෝමාගම කඩුවෙල හා ගම්පහ නගර ආශිතව ප්‍රවාහන මධ්‍යස්ථාන ඇති කිරීම.
                               මෙමගින් දුර පලාත්වල සිට  තොළඹ නගර වෙත ඇතුල්වන පොදු හෝ පුද්ගලික රථවාහන සදහා රථ ගාල් ඇති කිරීම.එතැන් සිට කොළඹ නගරය පුරා විධිමත් කාලසටහනකට අනුව ක්‍රියාත්මක වන දුම්රිය පද්ධතියක් ඇති කිරීම හා පුද්ගලික හා ලංගම සුඛෝපභෝගී බස් රථ සේවයක් කොළඹ නගරය ආශ්‍රිතව ඇති කිරීම.මූලික ප්‍රවාහන මධ්‍යස්ථාන යා කරමින් අධිවේගී දුම්රිය පද්ධතියක් ඇති කිරීම.
           අභ්‍යන්තර ගුවන් ගමන් සදහා අඩු වියදම් ක්‍රම සොයා බැලීම.එය සාර්ථක වේ නම් දිනපතා නිශ්චිත කාලසටහනකට අනුව හදුනාගත් ගමනාන්ත වෙත ගුවන් ගමන් ක්‍රියාත්මක කිරීම.

  • කුඩා ජල මූලයන් ආශ්‍රිත ප්‍රෙද්ශ වල අනිවාර්ය වගාවක් ලෙස කුඹුක් හා වෙනත් ජලය ආරක්ෂා කරගන්නා ගස් වර්‍ග සිටුවීම
  • රටේ සාමාන්‍ය දඩ ක්‍රමය වසර කීපයකට වතාවක් යාවත්කාලීන වන පරිදි නීති සැකසීම.යල්පැන ගිය නීති සියල්ල වර්ථමානයට ගැලපෙන ලෙස සකස් කිරීම.අධිකරන ක්‍රියාවලිය සාමාන්‍ය ජනතාවට වඩාත් පහසු වන ලෙස සංශෝධනය කිරීම.නඩු කටයුතු වලදී සියලු පාර්ෂව එකග වන භාෂාවකින් පමණක් සිදු කිරීම.කවුරුන් හෝ ඉල්ලා සිටින ඕනෑම විටෙක භාෂා පරිවර්ථකයෙක් සැපයීම.නීතීඥයන් හා විනිසුරු වරුන්ටද සදහන් කල පරිදි එකම භාෂාවක් පමණක් භාවිත කරන ලෙස නියෝග කිරීම.රට තුල කෙරෙන සියලුම ගිවිසුම් සිංහල හෝ දෙමළ (දෙපාර්ෂවය එකග වන ) භාෂාවන්ගෙන් පමණක් සිදු කිරීම.එසේ නොවන ඕනෑම අවස්ථාවක අදාල පුද්ගලයා හෝ ආයතනයට එරෙහිව නීත්‍යානුකූලව කටයුතු කල හැකි පරිදි නීති සැකසීම
  • රජයේ හා පුද්ගලික රෝහල්  තුල උපත ලබන සෑම දරුවකුගේම ජීව විද්‍යාත්මක දත්ත සහිත විද්‍යුත් දත්ත බැංකුවක් ස්ථාපිත කිරීම.ඉන් පසු ඉදිරියට රජයේ පාසල් ලබා දීම,විභාග සමත් වීම්,රියදුරු හෝ විදේශ ගමන් බලපත්‍ර ලබා ගැනීම්,අධිකරණයෙන් දඩුවම් ලැබීම් ආදී සියලුම විස්තර සහිතව යාවත්කාලීන කර පවත්වාගෙන යෑම.උප්පැන්න සහතිකයේ සදහන් තොරතුරු ආශ්‍රෙයන් දෙමව් පියන් හා සහෝදර සහෝදරියන් පිලිබද විස්තර ඇතුලත් කිරීම.
                           රටේ සෑම පුරවැසියෙකුටම නියමිත වයස සැපිරූ පසු ඉහත සදහන් කල දත්ත බැංකුවට සම්බන්ධ කෙරුණු හැහුනුම්පතක් නිකුත් කිරීම.එහි සදහන් දත්ත කියැවීමේ පහසුකම් මහජනයා සමග සෘජුව කටයුතු කරන රාජ්‍ය ආයතන වෙත ලබා දීම.
       119 හදිසි සේවා දුරකත ඇමතුම් අංකය ජාත්‍යන්තර හදිිසි සේවා සදහා අංකය වන 911 ලෙස වෙනස් කිරීම.එම හදිසි ඇමතුම් සදහා ප්‍රතිචාර දැක්වීමට විශේෂ පුහුණුව ලත් පොලිස් ඒකක සෑම පොලිස් ස්ථානයකම ස්ථාපනය කිරීම.එම ඒකක හා හදිසි ඇමතුම් සේවයේ මූලස්ථානය බුද්ධී නිලධාරීන් හා හදිසි කටයුතු වලට පුහුණු කරන ලද නිළධාරීන් සහිතව පිහිටුවීම.එසේ ලැබෙන සෑම හදිසි ඇමතුමකටම අදාල අංශ හරහා ඕනෑම ආයතනයකට සම්බන්ධ වී ක්‍රියා කිරීමට අවශ්‍ය කරන නීති රාමු හා පහසුකම් සැලසීම.

  • රාජ්‍ය ආයතන වලට අවශ්‍ය වාහන හා යන්ත්‍ර සූත්‍ර නිශ්පාදනයට හා අලුත්වැඩියාවට අවශ්‍ය උපකරණ ඒ ඒ ආයතන වලට ලබා දීම.
  • රාජයේ තාක්ෂණික පර්යේෂණ ආයතනයක් ඇති කිරීම හා ඊට අවශ්‍ය ඇනුම මෙරට හෝ විදෙස් විද්‍යාඥයන්ගෙන් ලබා ගැනීම.එම ආයතනය තුල ජීව විද්‍යා, රසායන විද්‍යා,භෞතික විද්‍යා පර්යේෂණ සහදා අවශ්‍ය සියලුම පහසුකම් සලසා රටේ ඕනෑම පුරවැසියකුට තමන්ගේ පර්යේෂණ යෝජනාව ආයතනයේ විශේසඥ මණ්ඩලය වෙත ඉසිරිපත් කර අනුමැතිය ලබා ගෙන තමන්ගේ පර්යේෂණය එම ආයතනයේ සම්පත් භාවිත කරමින් ආයතනයේ වගකිවයුත්තන්ගේ නිරීක්ෂණය යටතේ නොමිලේ සිදු කිරීමට අවස්ථාව සැලසීම.
  • රාජ්‍ය අංශයේ කාර්මික දැනුම සහිත සියල්ලන්ගේම නව අදහස් හා යෝජනා ලබාගෙන ප්‍රාෙයා්ගික යෝජනා ක්‍රියාත්මක කිරීම සදහා පහසුකම් ලබා දීම.
  • පොලිස් ස්ථාන සියල්ල වහාම ක්‍රියාත්මක වන පරිදි ඩිජිටල් කරණයට ලක් කිරීම හා පැමිණිලි ලබා ගැනීමේ තාක්ෂණික ක්‍රමය ක්‍රියාත්මක කිරීම.පොලිස් නිලධාරීන් හා නිලධාරිනියන්ගේ ශරීර යෝග්‍යතාවය හා ගිනි අවි හැසිරවීම පිලිබද හැකියාව මැන බැලීමට වාර්ෂිකව විභාග ක්‍රමයක් ඇති කිරීම හා එය පිට පිට දෙවතාවකදී අසමත් හෝ පෙනී නොසිටින අය සේවයෙන් පහ කිරීම.
  • රටේ පවතින වැව් හා වාරිමාර්ග නිසි ලෙස ප්‍රතිසංස්කරණය කර නඩත්තු කිරීම සදහා යාන්ත්‍රණයක් සැකසීම.නියං කාලවලදී සිදී යන වැව් ප්‍රතිසංස්කරණය කර ගැනීම සදහා අදාල රාජ්‍ය ආයතන සමග ග්‍රාමීය කෘෂී කමිටු බල ගැන්වීම.
  • මධ්‍යම කදුකර ප්‍ර දේශ තුල තවතුරටත් ජනාවාස ව්‍යාප්ත වීම වැලක්වීම හා හැකි සෑම ඉඩකම වනාන්තර ඇති කිරීම.
  • වතු ආශ්‍රිත ජීවත් වන කම්කරු ජනතාව සදහා මහල් නිවාස ඇති කර දැනට පවත්නා ලයින් කාමර සියල්ල ඉවත් කිරීම.ඔවුන් සදහා අවශ්‍ය වන අනෙකුත් පහසුකම් කඩිනමින් සැපයීම. වතු ජනතාවගේ මීලග පරම්පරා සදහා නිවාස ගොඩනැගීමේ වගකීම ඔවුන්ගේම බව තේරුම් කර දීම.
  • රජයේ වතු බදු පදනම යටතේ ලබා ගත් සමාගම් එම වතු මගින් නිසි ප්‍රෙයා්ජන ගනී දැයි සොයා බැලීම හා එසේ නොවන අවස්ථා වල වතු වගාවට උනන්දු වෙනත් පාර්ශව වෙත එම ඉඩම් ලබා දී රටේ නිශ්පාදන ඉහල දැමීම

මතකයන්...



මේ හැම ඉස්කෝලෙකම වගේ ක්‍රීඩා උත්සව  තියෙන කාලෙ.ඉස්කොලෙන් අයින් වෙලා අවුරුදු එකොලහක් ගෙවිල මම මේ අවුරුද්දෙත් ඉස්කෝලෙ දුවගෙන ගියා ක්‍රීඩා උත්සවේ බලන්න.ගන්කන්දට ඇතුලත් උන දවසෙ ඉදන් අද වෙනකන් ගෙවුන අවුරුදු විස්සකට ආසන්න කාලෙදි මට යන්න බැරි උනා නම් ඒ එක නිවාසාන්තර ක්‍රීඩා උත්සවයකට විතරයි.මොන රස්සාව කලත් මීට් එක දවසට එක විදියකට වැඩක් කරගෙන ඉන්න බැරි ලෙඩක් හැදෙනව.ඒක හරියන්න නම් ඉස්කෝලෙට යන්නම වෙනව.
           ගන්කන්දට යන්න කලින් මං ගිය කහවත්ත ප්‍රාථමිකේ නිවාසාන්තර ක්‍රීඩා උලෙලවල් තියා නිකන් තරගයක් වත් ඒ කාලෙ තිබුණෙ නෑ.ඉතිං ගන්කන්දට ගිය ගමන්ම අත්දැකපු නිවාස, ක්‍රීඩා උත්සව කියන දේවල් මට මැජික්! ඇතුලත් උන දවසෙම අපේ ඇතුලත් වීමේ අංකෙන් අපි අයිති වෙන නිවාසෙ මොකක්ද කියල තීරණය උනා.මං අයිති උනේ රුහුණට.හය වසරට අපි ඇතුලත් වෙද්දි නිවාසාන්තර ක්‍රීඩා තරග වලට තෝරා ගැනීම් පටන් අරන්.ඒ  කාලෙට උගන්නන්නෙ නැති නිසා අපිට තවත් සංතෝසයි.අලුත් ඉස්කොලෙ මුණ ගැහුන මුල්ම උත්සවය වෙච්චි ක්‍රීඩා උත්සවය දවසෙ මමයි තව යාලුවෙකුයි එකතු වෙලා අපේ නිවාසෙ පාටින් කොඩියක් මැහුව.මූලික තරග තියපු කාලෙ අයියල අක්කල තම තමන්ගෙ නිවාසෙ පාටින් කොඩි උස්සගෙන කට්ටියව දිරිමත් කරන එක දැකල අපිටත් හිතුන අන්තිම දවසට කොඩියක් හදාගන්න.කලින් දවසෙ ඉටි රෙද්දක් අරන් අම්මට කියල කොඩි කණුව දාන්න සාක්කුවකුත් මහගෙන මං ඉස්කොලෙ ගියෙ.මටත් යාලුවටත් මේ කොඩිය මැද අපේ නිවාසෙ නම ගහන්න ඕනි.දහ අතේ කල්පනා කලත් අපිට ඒකට ක්‍රමයක් මතක් උනේ නෑ.අන්තිමට සුදු කොල වලින් අකුරු කපල ඉටි රෙදි කොඩියෙ අලව ගන්න පුලුවන් උනා.ඉස්කෝල වත්තෙන් හොයා ගත්තු පොලු කෑල්ලකට කොඩියත් අමුණගෙන පිට්ටනියට දුවන් ගිහින් දෙපාර වනනකොට අකුරු ටික ගැලවිලා ගිහින්.අපිට ගානක් වත් නෑ.කලු තෙල් වලින් තණ කොල උඩ ඇදපු මංතීරු ලගටම වෙලා කොඩිය වනද්දි දැනුනෙ අමුතුම ගැම්මක්.ඒ අතරෙ තියෙන තරග වලින් අපේ නිවාසෙ අය දින්නම ඒ අයව තරග අවසන් කරන තැන ඉදන් නිවාස කුටියට එක්කන් එන්න වැඩිහිටි ශිෂ්‍යෙයා අපිව යවනව.ලොකු සෙනගක් බලන් ඉද්දි කොඩියකුත් අරන් පිට්ටනිය මැදින් යන එක දැනුනෙ පුදුමාකාර ආඩම්බර කමක් විදියට.ඒ ආඩම්බරකම නිසා සමහර තරග වලින් අපේ නිවාසෙ අය පැරදුනත් මම හරි යාලුව හරි කොඩියත් අරන් දුවගෙන යනව.ඒ මගේ පලවෙනි නිවාසාන්තර මළල ක්‍රීඩා උලෙලේ මතක.
           
                  කාලය ගෙවිල යද්දි අපි ඉහළ ශ්‍රේණි වලට ගියා.මමත් ක්‍රීඩා අංශ වලට සම්බන්ධ වෙලා ජයග්‍රහන වගෙම පරාජයනුත් අත් වින්ද.පාසලට ඇතුලත් වෙලා වසර කීපයක් ගත වෙද්දි නිවාසාන්තර ක්‍රීඩා උත්සවයක අභ්‍යන්තරය අපිට ටිකෙන් ටික තේරෙන්න ගත්ත.සාමාන්‍ය පාසල් කාලෙදි වැඩිහිටි ශිෂ්‍යයන් ලගකටවත් නොගන්න කණිශ්ඨ ශිෂ්‍ය යො වෙච්චි අපිට ක්‍රීඩා උත්සවය කාලෙට වටිනාකමක් ලැබෙනව.ක්‍රීඩා හැකියාව තියෙන කෙනෙක් නම් වටිනාකම වැඩියි.මං කොහොමත් ඒ වටිනාකමට ආසයි.ලොකු අයියල අක්කල ඇවිත් හුග කාලෙක ඉදන් දන්නව වගේ කතා කරද්දි,ක්‍රීඩා කරනකොට ඔල්වරසන් දෙද්දි දැනෙන්නෙ අමුතු හයියක්.

            පාසල් ජීවිතේ සුන්දරම කාලෙ තමයි 2006 අවුරුද්ද.ඒ කියන්නෙ සාමාන්‍ය පෙළ විභාගය ඉවර කරන් පාසලට ඇවිත් මාස කීපයකින් උදා වෙච්චි අවුරුද්ද.සාමාන්‍ය යෙන් ගන්කන්දෙ ක්‍රීඩා උත්සවයක බැඩි බරක් පැටවෙන්නෙ දොලහ ශ්‍රේණියෙ අයට.ඉතිං 2006 අවුරුද්දෙ ඒ වගකීම ලැබුණෙ අපිට.පලවෙනි නිවාස රැස්වීම  වෙලේ සභාපති විදියට මං තේරුණා.පුංචි කාලෙ ඉදන් ජයග්‍රහනය ප්‍රාර්ථනා කරපු නිවාසයෙ නායක කම!!! බලාපොරොත්තු උනා වගෙම අනිත් නිළධාරී මණ්ඩලයටත් හොද අය පත් උනා.එදා ඉදන් අපේ එකම ඉලක්කය ජයග්‍රහනය!
           නිවාසයෙ නායිකාව විදියට තේරුණේ මගේ ගජයෙක්.මෙච්චර කල් ජීවිතේ හුස්ම වගේ ලගින් ඉන්න අත්තිවාරම වැටුනෙ ඒ නායිකා කම වෙන්න ඕනි.නායකයෙක් විදියට මගේ කර උඩ වැටුනු හැම බරක්ම බෙදා ගන්න ඇය ලගින් උන්න.සැලසුම් හදන් ටිකෙන් ටික දින පහු කරන් යද්දි තරගකාරීත්වය වැඩි නිසාම හොදම යාලුවො පවා තම තමන්ගෙ නිවාස වල රාජකාරියට හිර උනා.හැමෝටම අවශ්‍ය උනේ තමන්ගෙ නිවාසය ජයග්‍රහනය කරවන්න.සමහර වෙලාවට යම් යම් අය අතරෙ නොයෙක් කාරනා නිසා පුංචි පුංචි ගැටුම් ඇති නොවුනම නෙවෙයි.ඒ සියල්ල මැද මං එක්ක හිටගත්තෙ නායිකා යෙහෙලිය සමග මගේ නිලධාරී මණ්ඩලය විතරයි.
        වෙහෙසකර දින ගණනාවකට අවසානයේ නිවාස සෑදීම සදහා නිදි නැති රැයකටත් පසුව සමාප්ති උත්සව දවස උදා උනා.ඒ වෙද්දි පලමු තැන ගන්න මගේ නිවාසයත් සමග තව නිවාසයක් කරට කර සටනක.අපි පුලුවන් හැම උත්සාහයක්ම අරන් අවසන් දවසෙ ක්‍රියාත්මක කරන ක්‍රීඩා ඉසව් වලින් වැඩි ලකුණු ප්‍රමාණයක් ලබා ගන්න සැලසුම් කලා.ක්‍රීඩා උත්සවය අතරතුර විටින් විට නිවේදනය කල ලකුණු තත්වය නිසා හදගැස්ම තව තවත් වැඩි උනා.සියලුම තරග අවසානයේ ආචාර පෙළපාලිය ට පෙරාතුව මුලු පැල්මඩුල්ලම වසාගෙන මහා වර්ෂාවක් ඇති උනා.ඒ වෙද්දි මං හිටියෙ ප්‍රධාන වේදිකාවෙ.ආරාධිත අමුත්තන් ගුරුවරුන් සියල්ලම හිස් බැල්මෙන් බලා හිටියෙ ත්‍යාග ප්‍රදානෝත්සවය  හේදිලා යයිදෝ කියන සැකයෙන් වෙන්න ඕනි.ඇතිවෙච්චි වර්ෂාව නිසා ක්‍රීඩා පිටියෙ තණකොල වසාගෙන ජලය එක් රැස් උනා.මේ නිසා ත්‍යාග ප්‍රධානෝත්සවය අත්හැර දැමුනු බව නිවේදනය වෙද්දි මං මගේ නායිකා යෙහෙලියගෙ කුඩේ යටින් ඇයත් සමගම අපේ නිවාස කුටිය වෙත යමින් හිටියෙ.ජයග්‍රහනය රුහුණු නිවාසය ට හිමි වෙන බව හීනෙන් වගේ නිවේදනය වෙනව මතකයි.මං සතුටට මගේ සගයව තුරුලු කර ගත්තද කොහෙද.සති ගණනාවක මහන්සියෙ අග්‍ර ප්‍රථිපලය අපිට ලැබුණ සංතෝසෙ තවමවත් අකුරු වලට පෙරලන්න හැකියාවක් නෑ.ඒ වෙනකන් නිවාස වලට බෙදිල උරින් උර ගැටුනු අපි සියල්ල දැඩි වර්ෂාවක් ඇද හැලෙද්දිම පිට්ටනිය මැදට පැණල සතුට සැමරුව.නොහොද නෝක්කාඩු ඔක්කොම ඒ වැස්ස එක්ක හේදිලා ගියා.
         ඒ කාලෙ ඩිජිටල් කැමරා ෆේස්බුක් පිටු වගේ ඒව අපිට බොහෝ ඈතින් තිබුණු දේවල්.ෆේස්බුක් ලංකාවට ඇවිත් නැතුවත් ඇති.ෆිල්ම් රෝල් දාන කැමරා තිබුණෙත් එහෙමත් කෙනෙක් ලග.ඉතිං ජීවිතේ වටිනාම දවසක සැමරුම් සියල්ල මතකයට විතරක් ඉතිරි කරන් ගෙවිල ගියා.ඒත් මෙදා පාර මං ඉස්කෝලෙ ගියෙ නිකන්ම නෙවෙයි.අවුරුදු ගානක් තිස්සෙ අතින් වියදම් කරන් පාසලේ ක්‍රියාකාරකම් ආවරණය කරන සමාජ මාධ්‍ය ජාලා ක්‍රියාකාරිකයෙක් විදියට කැමරා ආම්පන්න ගොඩකුත් එක්ක.අපි අපිට ඉතිරි කරගන්න බැරි වෙච්චි සැමරුම් අපේම වර්ථමානිකයන්ට ඉතිරි කරල සියලු කටයුතු අවසානයේ නිශ්ශබ්දව පාසලෙන් ඇවිත් මුදල් එකතු කරල  තේ බිවුව.
 මං කවදත් ඒ කැපකිරීම කරන්නෙ හරි ආසාවෙන්!

මේ මගේ වෑයම                She is the one

Tuesday, February 6, 2018

ඔව් මං බෞද්ධ

ශ්‍රී ලාංකිකයෙක් විදියට ගොඩක් දුක හිතුන අත්දැකීමක් මේක.මේ රටේ අන්ධ විශ්වාසය තියෙන බෞද්ධයො ඉන්නකන් අපිට ගමනක් නෑ.ලෝකෙ පුරාවට ඇඹින්දක් වෙච්චි බෞද්ධ මිනිස්සු පුලුවන් තරමක් නෝන්ඩි වෙන කතාවක් මේ.
            මෑතකදි නුවර එළියෙ නිවාඩුවකට ගිය වෙලේ හවස වැව රවුමෙ වටයක් යන්න හිතාගෙන යද්දි ටිකට් ගන්න තැන ලොකු කලබලයක්.එතන හිටි කෙනෙක්ගෙන් ඇහුවම කිවුවෙ හාමුදුරු කෙනෙක් සීතලට අදින ඇදුමක් අරන් ගිහින් වගේ කතාවක්.අත්දැකල තියෙන දේවලුත් එක්ක මට හිතුනෙම හාමුදුරු කෙනෙක් මොකක් හරි පිස්සුවක් නටල කියල.කාරණාව හරියට තේරුණේ නැති නිසා මං සිද්දිය වෙන තැනට කිට්ටු කරද්දි සිවිල් ලිට හිටි පොලිස් නිලධාරියෙක් කවුදෝ කාන්තාවක් එක්ක ඉංග්‍රීසියෙන් සැර කතාවක්.වටේ හිටි මිනිස්සු සිංහලෙන් බෙරිහන් දෙනව.බැරිම තැන පොලිස් නිලධාරිය අර කාන්තාව එතැන තිබ්බ කාර්යාලයට එක්කන් ගියා.ටිකට් නිකුත් කරන්න තිබුණ කවුලු වලින් දෙන්න තුන්දෙනා ඇතුලට එබීගෙන මර හඩ දෙනව.අර කාන්තාව පොලීසියට ගෙනියන්න, ඇදුම් ගලවන්න වගේ දේවලුත් ඒ අතරෙ ඇහෙනව.ගැහැනු පිරිමි වගෙම තරුණ වයසෙ හිමි නමවල් කීප දෙනෙකුත් කෑ ගහන පිරිස අතරෙ!
                     මට මේක ලොකු පටලැවිල්ලක්.වට පිට බලද්දි පෙනුමෙන් ලංකාවෙ වගේ උනාට කතාව ඉංග්‍රීසියෙන් කරන කාන්තාවො දෙතුන් දෙනෙකුත් එක්ක පිරිමි කීප දෙනෙක්.ඒ මිනිස්සු බය වෙලා මොකක්ද කරන්නෙ කියල කතා වෙනව.බලාගෙන යද්දි ඒ පාකිස්ථාකයෙන් ලංකාවට ආපු සංචාරකයො.ඒ අය අතරෙ හිටි කාන්තාවක් සීතලට ඇදන් හිටි ඇදුමෙ බුදු රුවට සමාන රූපයක් මුදුණය කරල.අපේ අයට ඩෝං ගිහින් තියෙන්නෙ ඒකට.ඒ මනුස්සයට තමන් දැන හෝ නොදැන කරපු වරද පෙන්නල දීල ඇදුම ඉවත් කරන්න කටයුතු කරන්නෙ නැතුව ඇදන් හිටි කෙනාව බය කරල කෑ ගහල මැරුවෙ නැති ටික විතරයි.
  මේක බලන් ඉදල එපාම වෙච්චි තැන මං කතා කරන්න පටන් ගත්ත.දෙයියනේ ඒ මනුස්සයට කරපු වරද පැහැදිලි කරල දීල එයාව යවපල්ල.මේක ගෝත්‍රික රටක් නෙවෙයි......
                    මගේ කතාව ඇහුනු ගමන් අන්ධ ශ්‍රද්ධාවෙන් හිටි අය මගෙත් එක්ක පැටලෙන්න ආව.හරියට අර ගෑනු කෙනා ම්ලේච්ච තලේබාන් වරුන් එක්ක කුමන්ත්‍රණය කරල ඒක පෙන්නුම් කරන්න අර ඇදුම ඇදන් ආව වගේ.බුදුන්ගෙ අවිහිංසාවාදී ධරිමය වෙනුවෙන් පෙනී ඉන්නව කියපු ඒ අය මට මැරුම් නොකා යන්න කිවුව.පිස්සො සීයක් එක්ක තර්ක කරල වැඩක් නෑ.මං හෙමින් යන්න ගත්ත.       
          පිටිපස්සෙන් එළවගෙන ආපු එකෙක් මගෙන් අහපි මං මොන ආගමේද කියල..



මං  බෞද්ධ! හැබැයි අන්තවාදී නෙවෙයි!!