අද මේ සුන්දර ඉරිදා රාත්‍රිය මැක්ස් එෆ් එම් හිත ලඟ වැඩසටහන සමග එකතු වෙන්නේ ඔබ දන්නා හඳුනන කෙනෙක් නෙවෙයි..
මේ මිතුරෙකුගේ සාදයකදි මට අහම්බෙන් මුණ ගැහුනු මහත්මයෙක්.. ඒ අහම්බය අමතක කරලා ඔහු අපේ වැඩසටහනට ගෙන්වා ගන්න තරම් ඔහුගේ විශේශ හේතුව ඔබ දන්නවද...
ඒ ඔහුගේ විශිෂ්ට ජීවන දැක්ම.මං ඔහුත් එක්ක කතා බහ කරපු කාලය ඇතුලත මට දැනුන ඒ විශේශ හැඟීම නිසා තමයි අද ඔහු මෙතන ඉන්නෙ... අපි ජීවිතේ බොහෝ දේවල් දිහා එකම විදියට බලද්දි අපේ ආරාධිතයා ඒ දේවල් දිහා බලන්නේ සම්පූර්ණයෙන් ම වෙනස් විදියකට.ඒ වෙනස තමයි හිත ලඟ වැඩසටහනේ මේ ආරාධිත ආසනය ඔහුට වෙන් කරන්න හේතුව වෙන්නෙ..
ඉතිං වැඩසටහනේ ආරම්භයේදි අපේ ආරාධිතයා ඔහුගේම වචනයෙන් හඳුනාගෙන පටන් ගත්තොත් හොඳ බව මම හිතනවා..
"
ඩිලාන් මහත්මයා.. ඔබ ගැන කෙටි හැඳින්වීමක් කලොත්...? "
"මේ ආරාධනයට බොහොම ස්තූතියි සාවිත්‍රි.. මේ මම ජීවිත කාලෙ කවදාකවත් ලැබෙයි කියලා හිතපු අවස්ථාවක් නෙවෙයි.. ."
"සහ ජීවිතේ කිසිම දවසක මේ වගේ වැඩසටහනකට සහභාගී උන කෙනෙක් නෙවෙයි.. නුහුරු කම නිසා මගෙ අතින් යම් වරදක් උනොත් සමාවෙන්න කියලා මම මුලින්ම ඉල්ලා සිටිනවා.."
"මම ඩිලාන්.., ඩිලාන් අබේසිංහ. පෞද්ගලික ආයතනයක ගබඩා භාර කරුවෙක් විදියට රැකියාව කරන, ජීවිත කාලෙන් වැඩි හරියක් ගෙවා අවසන් කියලා විශ්වාස කරන බොහොම සාමාන්‍ය මනුස්සෙක්.."
පූර්විකාවෙදි කිව්වා වගෙම ඩිලාන් කියන්නෙ ටිකක් අමුතු විදියට හිතන බොහොම නිහතමානී කෙනෙක් කියලා මගේ අසන්නන්ට හිතෙන්න ඇති.
"හො‍ඳයි ඩිලාන්.., අපි ආරම්භක ගීතය රස විඳලාම ඒ ගැන කතා කරමු.. මේ ඩිලාන් අබේසිංහ සිත ලඟ වැඩසටහනට තෝරාගත් පලමු ගීතය..."
ආරම්භ උනු ගීතය මගහැර මම ඔහුගේ කතාවට සවන් දුන්නෙමි..
... අපේ අනිත් ආරාධිතයන්ට තිබුණා වගෙම ඩිලාන්ටත් මේ ගීතය තෝරන්න හේතුවක් තියෙන්න ඇති..?
"ඔව් සාවිත්‍රි .. මේ වගේ වැඩසටහන් වලට එන හැමෝම වගේ මමත් අම්මා ගැන කියවෙන ගීතයක් මුලින් තෝරා ගත්තෙ අම්මා කියන චරිතයට පලමු තැන දෙන්න ඕන නිසා..මේක රැල්ලට එහමත් නැත්තම් සම්ප්‍රදායට මුල් තැන දීමක් නෙවෙයි.ඇත්ත අවබෝධයෙන් මුල් තැන දීමක්.."
මට වයස අවුරුදු 30ක් විතර වෙනකන් ම අම්මා ගැන තිබ්බෙ බොහොම සාමාන්‍ය හැඟීමක්.මිනිස්සු කියපු විදියට අම්මා තමයි අංක එක හෝ ලෝකෙ කවුරු නැතත් අපි වෙනුවෙන් අම්මා ඉන්නවා කියන එක මට එහෙම දැනුනෙ නෑ..
මගෙ පාසල් අවධියෙදි එක්තරා මූසල දවසක අපේ අම්මගෙ අනියම් සම්බන්ධය මගෙ අතට අහු වෙනවා..ඒ හැඟීම දරාගන්න බැරුව මම රැයක් එලි වෙනකන් වෙව්ලුවා...
එදා ඒ දැනුන හැඟීම එක්ක අම්මා කියන චරිතය මට තව ටිකක් දුරස් වෙනවා...
ඒ සිද්දියෙන් පස්සෙ කේන්ති ගිය තැන් වලදි මම ඕන තරම් අම්මට කෑ ගහලා තියෙනවා..හැබැයි පුතෙක් විදියට මං මගේ මට්ටමෙන් අම්මට කරන්න ඕන යුතුකම් ටික නොකලා කියන්න බෑ..
පහු කාලෙකදි, මට අවුරුදු තිහත් පහූ උනාට පස්සෙ මට දැනෙන්න ගන්නවා අම්ම කෙනෙක්ගෙ ආදරේ මොන තරම්ද කියලා....
මගේ අම්මා මං වෙනුවෙන් කොන්දේසි විරහිතව පෙනී ඉන්න පටන් ගන්නවා..මගේ සමහර ප්‍රශ්න වලදි මට වෙන්න තිබ්බ හානිය අවම කලේ හෝ නැති කලේ අම්මා..ඊටත් වඩා, . සාවිත්‍රි දන්නවා ඇති රත්තරං ආභරණ ගැන කාන්තාවන්ගෙ උනන්දුව කොහොමද කියලා.. ගැහැනියක් විදියට මගේ අම්මත් එහෙම චරිතයක්. සල්ලි නැති තැන් වලදි එකින් එක උකසට තිබ්බත් අතට මුදලක් ලැබෙන පලවෙනි අවස්ථාවෙ ඒ ආභරණ වලට මුදල් ගෙවන්න තරම් එයා ඒවට ආස කලා.. මගේ ප්‍රශ්න වෙනුවෙන් ඒවා එකින් එක ආයෙත් උකස් කරන්න අම්මා මොහොතකටවත් පසුබට උනේ නෑ..,
මගේ ලඟ මුදල් හිඟ වෙන්න ගත්තම එදිනෙදා වියදමට තිබ්බ මුදල් පවා, සමහරවිට අම්මගෙ මුලු විශ්‍රාම වැටුපම පවා මට දෙන්න එයාට පුළුවන් උනා...
දරුවෙක් වෙනුවෙන් අම්මා කෙනෙක්ට මොනවද කරන්න බැරි කියලා මම දන්නෙ නෑ.. අම්මා කෙනෙක්ගෙ ආදරේ ඒ තරම් විශාලයි.අපි ඒ ආදරේ තේරුම් ගන්න කාලය ගත කරනවා.එච්චරයි..
ඒ නිසා මම තෝරන මුල්ම ගීතය හැටියට අම්මා ගැන කියවෙන ගීතයක් තෝරා ගැනීම සාධාරණ බව ඔබට පැහැදිලි ඇති ඔබට...
No comments:
Post a Comment