Friday, November 8, 2019

හැමිනුනා



මෙවර ජනාධිපතිවරණ තරගය ආරම්භයේ දී සිට මේ සටහන ලියැවෙන,එනම් ජනාධිපතිවරණයට දින 7ක් පමණක් ඉතිරිව ඇති මොහොත දක්වා මගේ තේරීම ගෝඨාභයයි.ඒ ඔහු සර්ව සම්පූර්ණ නිසා නොව ප්‍රධාන අපේක්ෂකයන් දෙදෙනාගෙන් හොදම තෝරා ගැනීම ඔහු බව මා විශ්වාස කරන නිසාය.

ප්‍රතිවාදියාගේ මෙන් දේශපාලන වේදිකාවේ බහුල අත්දැකීම් නැති ඔහුට යටි ගිරියෙන් කෑ මොර දෙන්නට නොහැකි වීම ගැන මට ප්‍රශ්නයක් නැත.ඔහු විවිධ ක්ෂේත්‍ර වලට නවීන තාක්ෂණය මුසු කර රටට ලැබෙන ප්‍රයෝජනය වැඩි කරගන්නට සැලසුම් සකස් කරනා ආකාරය දෙස මා උනන්දුවෙන් අවධානය යොමු කලේ මරදානේ ඇති කල තාක්ෂණික උද්‍යානයේ ප්‍රයෝජනය පිලිබදව යම් වැටහීමක් ඇති නිසාය.

සාපේක්ෂව ඔහුගේ කතාවේ විනය සහ පැහැදිලි අනාගත සැලසුම් නිසා මගේ තේරීම පිලිබදව දෙවරක් කල්පනා කරන්නට අවශ්‍ය නොවීය.සජිත් ප්‍රේමදාස මහතා සුපුරුදු පරිදි තමන්ගේ තෑගි මල්ල ලිහා අරිමින් යන යන තැන  කවටයාගේ චරිතය රගපෑම නිසා ඔහු ගැන සලකා බැලීමක් අවශ්‍ය වන්නේ නැත. ගෝඨාභයගෙන් නොඇසුනු ප්‍රතිවාදියා ට මඩගැසීමේ තුඡ්ඡ ක්‍රමය ඊයේදී එලි බසින්නේය.දුප්පතුන්ට නැගී සිටින්නට මාලුවෙක් වෙනුවට බිලී පිත්තක් දෙන්නට (සමහරවිට අප ඔසවා තබා සිටි) සිටි ගෝඨා අද, දුප්පතුන්ට සහන මල්ලක් දෙන බව ප්‍රකාශ කර හැමිනුනේය (මට අනුව) !!!
දැන්,
 ආයෙමත් මගේ ඡන්දය මැද තැනකට ගෙනාවෙමි., තොපි දෙදෙනාගෙන් එකෙක් පුලුවන් නම් දිනාගනිල්ලා!

Wednesday, November 6, 2019

පුතාණෝ


සජිතාණෝගේ පෑඩ් කතාවට කිසිවක් නොලියන්නෙමැයි වීරිය කොට ගෙනසිටියත් සමහරක් මධ්‍යස්ථ සලු පොරවාගෙන සිටින අයගේ හැසිරීම නිසා එසේ ඉදීමෙන් පලක් නොවෙතියි සිතමි.පෑඩ් කතාව දුටුවනම මා සිතූයේ එය දවසේ ආතල් විය යුතු බවය.එසේ නොමැති නම් (කාන්තා) සනීපාරක්ෂාව පෑඩයකට ලඝු කරන්නට තරම් සිල්ලර මානසික මට්ටමක් රටක ජනාධිපතිධූර අපේක්ෂකයෙකුට තිබිය නොහැක.

නමුත් බුකී ඔස්තාද්ලා සජිතාණෝගේ ප්‍රකාශය සර්ව සාධාරණය කරන්නේ මාගල් තරම් දිග පල්හෑලි ලියමින් එය සිහිබුද්ධියෙන් යුතු කතාවක් බව සඵත කිරීමයි.සජිතානෝද දිගින් දිගටම සිය ප්‍රකාශය තහවුරු කරමින් සිටී.

සනීපාරක්ෂක තුවායක් නොමිලේ ලබා දීම හරහා සම්පූර්ණ වන කාන්තා සනීපාරක්ෂාවක් වේ නම් එය පුදුම සහගතය.අපේ රටේ වාර්ෂිකව නිකුත් වන සෞඛ්‍ය වාර්ථා වල පවා සනීපාරක්ෂක තුවා භාවිත නොකිරීම නිසා ඇති වන සංකූලතා හෝ වෙනත් ආසාධන තත්ව නිසා දැඩි තර්ජනයක් ඇති වී ඇති බව මා දැක නැත.ප්‍රශ්නය ඇත්තේ වෙනතකය.මේ තරම් දියුණු ලෝකයේදීවත් අපට කිසිදු විධිමත් ලිංගික සෞඛ්‍ය අධ්‍යාපනයක් ලැබෙන්නේ නැත.අවාසනාවකට අප ලිංගික අධ්‍යාපනය ලෙස දකින්නේ කාමුක වීඩියෝ පට පමණි.ඒවායේ අතුරු ඵල ලෙස තවමත් වයස 18 ට අඩු ලමා මව්වරු දකින්නට ඇත.

ජනාධිපති අපේක්ෂකයා ආමන්ත්‍රණය කල යුත්තේ එතැනටය.විධිමත් ලිංගික අධ්‍යාපනයක් රටේ ශිෂ්‍ය ප්‍රජාවට ලබා දීමටය.දැනුමෙන් සන්නද්ධ වන ගැහැනු පිරිමි දෙපාර්ෂවය තමන්ගේ සනීපාරක්ෂාව පිලිබදව උනන්දු වීම නිරායාසයෙන් සිදු වන්නකි.

එවිට,මාසයකට (එකක් රු 100-150 අතර පවතින) සනීපාරක්ෂක තුවා පැකට්ටුවක් නොමිලේ ලබා දීමක් අවශ්‍ය වන්නේ නැත.මොනවා හරි දෙයක් නොමිලේ දෙන බවට ඡන්ද පොරොන්දුවක් දීමට අවශ්‍ය නම් සජිත් ප්‍රේමදාස මහතාට තිබූයේ සහල් යම් ප්‍රමාණයක් එසේ ලබා දෙන බව කියන්නටය.මක් නිසාද යත්, සහල් සදහා මසකට යන වියදම හා බැලූ කල කාන්තාවන් දෙදෙනකු සහිත හතර දෙනෙකුගෙන් යුත් පවුලකට සනීපාරක්ෂක තුවා සදහා වියදම් වන්නේ සොච්චමක් පමණකි.

Monday, August 5, 2019

ඒ අතීතය


මං....... සීතලට, මීදුමට ආස බව එයා හොදින්ම දැනන් හිටිය.

සුන්දර කදු වලල්ලක් පාමුල හිටි එයාට හැමදාම වගේ ඒ දේවල් අත් දකින්න පුලුවන් උනාට, එතැනට අයිති නැති එයත්, ඈතක හිටි මමත්, මීදුම- සීතල එක්ක දැනෙන හැගීමට ලෝබ කලා..

ලෙක්චර්ස් ඉවර වෙලා හොස්ටල් ආවම, හවසට තේ කෝප්පෙත් අරන් බැල්කනියට ඇවිත් කෝල් කරන එක එයාගෙ පුරුද්දක්.ඒ වෙලාවට මං වැඩක් දාගත්තොත් ඔන්න ඉතිං තරහයි.රෑ වෙලා තමයි ආයෙ කතා කරන්නෙ."සීතලයි අනේ.. ජර්සියත් දාගත්තා" කියල නෑසුනා නම් ඒ දවස් අතලොස්සක විතරයි.වලාකුලු වගේ මීදුම ඇවිත් හැමදේම වහ ගන්න එක ගැන එයා කියද්දි මං ඒ චිත්‍රය හිතින් මවාගෙන රස වින්ද.

අපි දෙන්නම මීදුමෙන් පිරුණු කදු වලට ආදරෙයි...



මොන දේ කරන්නත් කලින් ඒ ගැන මට කියන එක එයාගෙ පුරුද්දක්. සමහර දවසට අපි වීඩියෝ කොල් ගන්නව.කාලයක් මං ඔපිස් ගිහින් කරපු පලවෙනි වැඩේ ඒක.ලග හිටි ටෙඩියො ටික වට කරන් එයා මට ඒ අය ගැන විස්තර කියනව.අන්තිමට... හොස්ටල් එකේ හිටි බලු කුක්කවත් මං අදුනනව.

දවස තිස්සෙ මූණ දෙන්න සිද්ද වුනු දේවල් මං කියවද්දි එයා සාවධානව අහන් ඉදල පැහිච්ච ආච්චියෙක් වගේ උපදෙස් දෙනව.එයාගෙ ලස්සන පොටෝ එකක් ගත්තම මුලින්ම එවුවෙ මට.එහෙම එවපු පිංතූර ගොන්නක් පරිස්සමට අරන් තියල තවමත් ඇති.

උපාධීය ගන්න මාස කීපයක් ඉතුරු වෙලා තියෙද්දි  බැජ් එකේ ලමෙක් එයා ගැන උනන්දුයි කියල කිවුවෙත් තේ විරාමයකදි..ඒව හරි සාමාන්‍ය නිසා මට කියන්න දෙයක් තිබුණෙ නෑ.ගැලවීමක් නැති තැන එයා මගේ අංකය අර පිරිමි ලමයට දීල තිබුණ.කතා කල වෙලේ මං කියෙව්වෙ එයාගෙ පිස්සු වැඩ ගැන.පොඩි දරුවො වගේ දුක හිතන එක ගැන.


ඒ ඇමතුමට දැන් අවුරුදු ගානක් ගිහින්.. එයා මගේ අංකෙ අර ලමයට දෙන්න ඇත්තෙ වෙන අදහසකට..

දැනුයි මට කල්පනා වෙන්නෙ.....

Monday, May 20, 2019

නාඩන් මත්තල


පාස්කු ඉරිදා ප්‍රහාරයෙන් පසු ලංකාවේ සංචාරක කර්මාන්තය නැත්තටම නැති වී ඇති බව රහසක් නොවේ.ලෝකයේ බොහෝ සංචාරක දර්ශක වල 2019 වසර වෙනුවෙන් නිකුත් කල සංචාරය කල යුතුම රටවල ලැයිස්තුවේ පෙරමුණ ගන්නට ලංකාවට හැකි උනිද අප්‍රේල් මස අවසානයේදී සිදු වූ අවාසනාවන්ත ප්‍රහාරය නිසා මේ වන විට සංචාරක හෝටල් පාලුවට ගොස් ඇත.සංචාරක කර්මාන්තය ආශ්‍රිත තම ජීවිකාව සපයා ගත් ලක්ෂ සංඛ්‍යාත පිරිසකට තමන්ගේ ආදායම් අහිමිව ගොස් ඇත.

ප්‍රහාර මාලාවේ ප්‍රධාන ඉලක්කයන් වූයේ කොළඹ හා මීගමුව ආශ්‍රිත ප්‍රදේශයයි.අධික ජන ඝනත්වය හා විවිධ ජාතීන්ට අයත් ජන කොටස් මිශ්‍රව වාසය කරන නිසාවෙන් එම ප්‍රදේශ වල තව දුරටත් ආරක්ෂාව 100%ක් සහතික කල යුතුව ඇත.ආරක්ෂාව අවම තැනකට විදේශිකයන් නොපැමිණෙන බව පුදුමයක් නොවේ.නමුත් සංචාරය පිණිස මෙරටට පැමිණෙන අති බහුතරයක් පැමිණෙන්නෙ කොළඹ නගරය තුල සංචාරය කිරීමට නොව ලංකාවේ ස්වාභාවික සෞන්දර්යය විදීමටය.ඔවුන් යන්නේ දකුණු වෙරල තීරය, යාල හා උඩවලව වනෝද්‍යාන, ආරුගම්බේ, මහනුවර, සීගිරිය, අනුරාධපුර පොලොන්නරුව ආදී ස්ථාන වෙතය.

සෑම අදුරු වලාවකම රිදී රේඛාවක් ඇති බව පැරණි කියමනක සදහන් වී ඇත.අකලට මෙහෙයුම් කටයුතු සිදු වන මත්තල ගුවන් තොටුපලින් මේ අවස්ථාවේ මහගු ඵල ලබා ගත හැකි අවස්ථාවක් උදා වී ඇත.සංචාරකයන් බහුතරයක් පැමිණෙන යුරෝපයේ සිට මත්තල වෙත ශ්‍රී ලංකන් සමාගම හරහා සෘජු ගුවන් ගමන් ප්‍රවර්ධනය කර තදබදයෙන් පිරි කොළඹ නගරය මගහැර සැනෙන් සංචාරක ගමනාන්තයට ලගා කරවීමේ වැඩපිලිවෙලක් ආරම්භ කල හැක.මත්තල වෙත පැමිණෙන යානා වල සිටින කොළඹ නගරය වෙත යා යුතු මගීන් වේ නම් නියමිත කාලසටහනකට අනුව  යම් සහනදායී මිලකට ගුවන් හමුදාව මගින් රත්මලාන වෙත ගුවනින් ප්‍රවාහනය කල හැක.මෙම දුෂ්කර කාලසීමාවේදී මෙරටට පැමිණෙන සංචාරකයන්ගෙන් අයකරගනු ලබන ගුවන්තොටුපල ගාස්තු හා වෙනත් ගාස්තු වේ නම් ඒවා ඉවත් කිරීම හෝ සැලකිය යුතු මට්ටමකින් පහත හෙලිය හැක.

ගුවන් යානා පැමිණීමෙන් පසු ශ්‍රී ලංගමය යටතේ ඇති පොදු රාජ්‍ය මණ්ඩල රාජ්‍ය නායක සමුලුවේ පහසුව වෙනුවෙන් මෙරටට ගෙන්වූ සුඛෝපභෝගී බස් රථ යොදා ගනිමින් නිශ්චිත ගමනාන්ත වෙත (උදාහරණ ලෙස ගාල්ල,හික්කඩුව, ඇල්ල ආදී ප්‍රදේශ) බස් සේවා සැපයිය හැක. මත්තල ආශ්‍රිත ප්‍රදේශ වල ජීවත් වන බහුතර සිංහල ජනතාව නිසා ආරක්ෂක විධි විධාන තර කිරීමේ ගැටලුවක් ඇති නොවේ.ආරම්භයේදී සංචාරකයින්ගේ නවාතැන් සදහාද ප්‍රමාණවත් තරම් හෝටල් කාමර ප්‍රමාණයක් දකුණු වෙරල තීරය තුලත් උඩවලව හා ඇල්ල ආශ්‍රිත ප්‍රදේශ වලත් පිහිටා ඇති නිසා ව්‍යාපෘතිය අසාර්ථක වීමේ තර්ජනයක් නැත.

සාම්ප්‍රදායිකව ආරක්ෂාව තහවුරු බව ලෝකයට ඒත්තු ගන්වා සංචාරක කර්මාන්තය ගොඩ නැගීමට මිඩංගු කල හැකි කාලයක් අපට නැත.ලෝකයේ තවත් බොහොමයක් රටවල් අපට සිදුවූ අවාසනාවන්ත තත්වයෙන් වාසි ලබා ගැනීමට කටයුතු කරමින් ඇත.ඉදින් මත්තල අප ගලවා ගැනීමේ දොරටුවයි..

Wednesday, May 15, 2019

ඛේදවාචකය පටන් ගත්තා පමණි

මේ කතාවෙ ආරම්භය මීට අවුරුදු දෙකකට විතර කලින්.රත්නපුර දිස්ත්‍රික්කයෙ තියෙන එක්තරා නගරයක ඉතාම හොදින් ව්‍යාපාර කරගෙන ගිය වයස අවුරුදු 50කට වැඩි ද්‍රවිඩ ව්‍යාපාරිකයෙක්.එයාගෙ ජංගම ගිණුමෙ මාසික හුවමාරුව රුපියල් මිලියනයකට වැඩියි.

ණය ගනුදෙනු, පොලී මුදල් ආදී බොහෝ කාරණා නිසා මේ කියන මනුස්සයගෙ ව්‍යාපාරෙ ටිකෙන් ටික බිද වැටෙන්න ගත්ත.අවසානයේ ගෙවන්නට තිබුණු ණය වල හිලව්වට මිනිස්සු කඩේ තිබ්බ බඩු ටිකත් අරන් ගියා.ඉතුරු වෙච්ච බඩු ටිකත් එක්ක අවුරුදු ගාණක් වෙළදාම් කල කඩ කාමරය ලග ඉටි රෙදි මඩුවකට යන්න  කතා නායකයට සිද්ද වෙනව.මේ වෙද්දි මගේ ව්‍යාපාරත් කඩා වැටෙන්න පටන් අරන්.මේ පුද්ගලයගෙන් අය වෙන්න තිබුණු මුදල රුපියල් 45000ක් විතර.ඉල්ලගෙන ගිය හැම දවසෙම කිව්වෙ, බොසා මං කොහොම හරි ගෙවන්නම් කියල.සමහර වෙලාවට එකම කතාව අහලම එපා නොවුන නෙවෙයි.

දවසක් අන්තයටම හිර වෙච්ච වෙලාවක ලැබෙන්න තියෙන මුදලින් කීයක් හරි අරන් එන්න කියල හිතාගෙන මං මෙයාව හොයන් යනව.මට ඔහු මුණගැහෙන්නෙ ක්ෂූද්‍ර මූල්‍ය ආයතනයක් ලගදි.හිතවත්කමට යාලුවෙක්ට අරන් දුන්න ණය මුදල,ගත්තු මනුස්සය ගෙවන්නෙ නැති කොට පුලුවන් තරම් කාලයක් ගෙවන් ඇවිත් බැරි වෙද්දි මගෑරිලා.ඇපයට අත්සන් කරපු අයට නඩු දානව කියල ලියුම් පිට ලියුම් එවල.කරන්න දෙයක් නැති තැන මේ මනුස්සයව එක්කන් ගිහින් ඇපයට අත්සන් කරපු දෙන්න එක්ක හිග ණය මුදල පියවල ණය ආයතනයෙන් ඔලුව නිදහස් කරගන්න උත්සාහ කරන වෙලාව.මං දැක්කම මේ ව්‍යාපාරිකය ලගට ඇවිත් සිද්දිය ඇති සැටියෙන් මට කිවුව.කට හඩ හරිම දුබලයි.අවසාන හරිය වෙද්දි වයස අවුරුදු පනහකට වැඩි වෙච්චි මනුස්සයගෙ දෑහෙන් කදුලු වැටෙනව.මට වෙන කරන්න දෙයක් තිබ්බෙ නෑ.පිටට තට්ටුවක් දාල මං ගෙදර ආව.

මේ සිද්දිියෙන් සති දෙකකට විතර පස්සෙ මට කෝල් එකක් දීපු මේ මනුස්සය මෙච්චර කාලයක් වෙල හෙලදාමක් කරන් හිටි නගරෙ අතෑරල වෙනත් තැනක තමන්ගෙ හිතවතෙක්ගෙ කඩකාමරයකට යන බව කියනව.ඒක පාර අද්දර ලෑලි වලින් හදපු පුංචි කඩයක්.බුලත් හුණු දුංකොල වගේ දේවල් තමයි වෙළදාම.ටික කාලයක් යද්දි කඩේ ටිකක් කල එළි කරගන්න මෙයාට පුලුවන් උනා.වෙලදාමත් යම් කිසි මට්ටමකට දියුණු උනා.


මේ අල්ල පනල්ලෙ කොහේදෝ යන පිස්සො රැලක් ස්වර්ගයේ ඉන්න කාන්තාවන් 72ක් එක්ක බුදිය ගන්න තියෙන ආසාවට බෝම්බ පුපුරවාගෙන මරාගෙන මැරෙනව


රටේ ආරක්ෂාවට කියල ප්‍රාදේශීය සභාවෙන් අනවසර ඉදිකිරීම් ඉවත් කරන්න හදිසියේ තීරණය කරනව.පහුවෙනිදම පොලීසිය ඉස්සර කරගෙන ආව ඩෝසරයකින් අර කියපු ලෑලි කඩ පේලියක් ම බිමට සමතලා කරනව.වෙලදාම් කරන් හිටි මිනිස්සු වෙන්නෙ මොකක්ද කියල හිතාගන්න බැරුව කම්මුලේ අත තියන් බලන් ඉන්නව.පසුවෙනිද මං ටවුමට යද්දි වහල තිබ්බ කඩයක අගු පිලේ බුලත් වට්ටි දෙක තුනක් තියාගෙන අර මනුස්සය ආයෙමත් වෙලදාම පටන් අරන්.


ප්‍රාදේශීය සභාවෙ ඉන්න එවුන්ට ජාතික ආරක්ෂාව මතක් වෙලා තිබ්බෙ බර ගානක් ජීවිත නැති උනාට පස්සෙ.අර මිනිස්සු කර කියාගන්න කිසි දෙයක් නැති තැන පුංචි කඩ කෑල්ලක් අටවගෙන එදා වේල හොයා ගත්තු අය.දවසින් දවස වෙළදාමක් කෙරෙනකොට ඒ ආදායමට ගණන් හදපු මිනිස්සු.එක පැයෙන් ඒ මිනිස්සුන්ගෙ වත්කමම නැති කරල දැම්මම මොනව හිතෙන්න ඇද්ද...

මේ සියල්ල පාස්කු ප්‍රහාරයේ අතුරු ඵල.ලොකු හෝටල් හැකි ඉක්මණින් අලුත්වැඩියා කරගෙන තමන්ගෙ ව්‍යාපාර කටයුතු පටන් ගනියි.අයිඑස්අයිඑස් ගැන හාන්කවිසියක දේවල් නොදන්න අහිංසක මිනිස්සු කබලෙන් ලිපට වැටිල අලු වෙලා යයි..
සහරාන් කියන මානසික රෝගියා නොහිටිය නම් අද රෑ අර මිනිස්සුන්ගෙ ගෙවල් වල බත් ඉදෙන්න තිබ්බ.

Thursday, April 25, 2019

හදිසියෙන් ආ ඒ වසන්තය

එරබදු මලුත් පරවුනු
කැවුම් අතිරහ සුවද අවසන
හදිසියෙන් ආ ඒ වසන්තය

මල් දෙවැට අභියස
වැව් පිටිය ගං දෑල නැතුවට
සෙනෙහෙ හමු විය එක් සැදෑවක

මහා ගිනි කප්පරක් උඩ
කදුලු දුක තනිරැක්ක හිත
ඇසිල්ලක සැනහුමක් ලැබුමට


Sunday, March 31, 2019

පටලවා ගන්න එපා.මේක ජාතිවාදය නෙවෙයි

මේ කියන්න යන්නෙ බැනුම් අහන්න නියමිත මාතෘකාවක්.....

ලංකාවෙ අපි බහුතරයක් කරන්නෙ කවුරු හරි දෙයක් කිවුවම ඒ ගැන කල්පනා නොකර සංස්කෘතිය,ආගම,ජාතිය,දේශප්‍රේමීත්වය වගේ රාමු වලට ක්ෂණිකව ඒ කතාව ගලපගන්න පුලුවන්ද කියල බලන එක.පලවෙනි උත්සාහයෙන්ම ඒක බෑ වගේ තේරුණොත් හෙම එතන ඉදන් අර කතාව කියපු එකාගෙ අම්මල තාත්තල විතරක් නෙවෙයි උගෙ ගෙදර ඇති කරන සුරතල් බල්ලගෙ පෙලපතත් හොයන් ගිහින් පාරක සංසර්ගයේ යෙදුන කියල බලු මී මුත්තෙකුට බණින ජාතියෙ උදවිය.ඒ නිසා මේ කතාව කියවලත් බණින උදවිය වැඩිවෙයි.

ඔබ අනුරාධපුර පොලොන්නරුව ඇතුලු බහුතර සිංහල බෞද්ධ පිරිසක් ඉන්න පලාතක යද්දි පාරවල් අයිනෙ හදල තියෙන බුදු මැදුරු කීයක් විතර දැකල ඇතිද? පුංචි කදු ගැටයක් දැක්කොත් ඒක උඩ පංසලක් හදල හෝ හදමින් ඉන්නව කියල කල්පනා වෙලා තියෙනවද? ආසියාවේ උසම, ලංකාවේ විශාලතම ආදී විවිධ විශේෂාංග පද ඉස්සර කරන් හදන බුදු පිලිම දැකල තියෙනවද?

එතකොට,

මීගමුව ප්‍රධාන කරගත්තු බහුතර කතොලික පිරිසක් ඉන්න පැති වල ගියාම දකින පුංචි පුංචි කුරුස ලකුණු, මරිය මව්තුමියගෙ ප්‍රථිමා....

හුංඩු බිත්ති හතරකින් පටන් අරන් අක්කරයක් විතර විසාල කරන මුස්ලිම් පල්ලි,ගෙවල් දහයට එක පල්ලියයි කියල හිතන් එක ගමට පල්ලි දෙක තුනක් හදල තියෙන එව්ව

වත්තෙ මිනිස්සු රබර් කිරි කපල,දලු කඩල හම්බ කරගන්න තුට්ටු දෙකෙන් කීයක් හරි තමන්ගෙ අරමුදලට කියල කපාගන්න කෝවිල්

මේ සියල්ල දැන් ඇති කියල හිතෙන්නෙ නැද්ද? හදපු දේවල් ඉවත් නොකලත් අඩුම තරමෙ අලුතෙන් හදන්න නොදී ඉන්න කෙනෙක් නැති වෙයිද.යාන්තම් පණ ගැට ගහගෙන දුවන රජයවල් මේ වගේ සංවේදී මාතෘකා වලට අත තියයි  කියල හිතන්නබෑ.ඒත් යන දේවාලෙකින් පලච්චාවෙ කියල මේව නියාමනය නොකලොත් අපි විනාස වෙනව.පිිලිමයක් පංසලක් පල්ලියක් කෝවිලක් හැදුන කියල මිනිස්සුන්ගෙ ආකල්ප වෙනස් වෙන්නෙ නෑ.
මිනිස්සුන්ව යොමු කරන්න ඕනි තමන් අදහන ධර්මයක ධර්මාවබෝධය පිණිස මිස සිමෙන්ති ගොඩවල් වර්ධනය කරන්න නෙවෙයි.අනික පිට රටක මනුස්සෙක් දැකල මේව මොහෙම වෙන්නෙ ඇයි කියල ඇහුවොත් විලි ලැජ්ජාවෙ බෑ.පාරක් අයිනෙ සරුවට වැඩුනු ගහක් දකිනකොට,ස්වාභාවික පරිසරයෙන් පිරිච්ච නොයිදුල් කදු මුදුන් දකිද්දි එන සැනසීම අර අන්ධ භක්තියෙන් ගොඩ නගපු ආගමික ස්ථාන දකිද්දි කොහොමටවත් එන්නනෙ නෑ.

Saturday, March 2, 2019

විමලේ නොදන්නා මහින්ද

කිසි දිනෙක පරාජය නොවනු ඇතැයි සිතූ මහින්ද ජනාධිපතිවරණය පැරදී ගෙදර ගියේය.පස මිතුරු කදවුර සේම මහින්දගේ කදවුරේ බොහෝ දෙනෙකුද සිතූයේ මහින්දගේ දේශපාලනය එතැනින් අහවර බවය.නමුත් පැරදි මාස 7ක් යන්නට මත්තෙන් නැවතත් ක්‍රියාකාරී  දේශපාලනයට මහින්දව කැන්දාගෙන ඒමට එවක විපක්ෂයට තල්ලු කර සිටි අතලොස්සකට හැකි විය.විමලේ එතැනින් සුවිශේෂී චරිතයක් වු බව රහසක් නොවේ.
ජවිපේ සිටි විමල්ටත් ජානිපේ නිර්මාණය කරමින් ජවිපේට ආයුබෝවන් කියූ විමල්ටත් එක පොදු සාධකයක් ඇත.ඒ තමන් විශ්වාස කරමින් ඇති මතවාදය වෙනුවෙන් කොන්දේසි විරහිතව පෙනී සිටීමය.විමල්ගේ බොහෝ ක්‍රියාකාරකම් වලට මා එකග නොවූවද ඉහත කී ගුණය නිසා මා ඔහුට ගෞරව කරමි.විමල් විශ්වාස කලේ ජනාධිපති මහින්ද පැරදී යද්දී පරාද වූයේ මහින්ද නොව මහින්ද නියෝජනය කල ජාතිකවාදී මතවාදය බවය.
විමල්ලාගේ මතය නිසා මහින්ද නැවතත් පාර්ලිමේන්තු ආයේය.නමුත් මෛත්‍රී ප්‍රමුඛ යහපාලන ආණ්ඩුව තරවටුවෙන් සම්මත කරගත් 19වැනි සංශෝධනය නිසා මහින්දට නැවත කිසි දිනෙක ජනාධිපති විය නොහැක.මහින්දට ජනාධිපති විය නොහැකි නම් ඔහුගේ පාලනයේ කෙලින් වැඩ කල ඝෝඨා, විමල්ලා විශ්වාස කරන ජාතිකවාදී මතය රැගෙන ඉදිරියට යා යුතු යැයි සාමාන්‍ය ජනතාව තුල රැල්ලක් නිමැවෙමින් ඇත.දේශපාලනයේ පරිණත මහින්දට වඩා ඉදිරි දැක්මක් ඝෝඨා තුල ඇති බව පෙනෙමින් ඇති නිසා සාම්ප්‍රදායික දේශපාලන බල කදවුරු කලබල වී ඇත.
මහින්දත් පසමිතුරු මෛත්‍රීත් එක් තැනට එන්නේ මේ සියලු සංතෑසියන් අතරතුරදීය.ඝෝඨාභයගේ දේශපාලන ආගමනය තමන්ටද තමන්ගේ පෞද්ගලික චේතනා වලටද අභියෝගයක් බව මහින්දට වැටහී ඇති සේය.බැසිල් නිර්මාණය කල පොහොට්ටුව තුල ඝෝඨාභයට එරෙහි කණ්ඩායම් කල එළි බහින්නේ ඒ නිසාය.එසේම පවතින ව්‍යවස්ථාමය අවුල් ජාලය තුල විධායක බල තල සහිත ජනාධිපතිවරයෙකුගේ භූමිකාව අහෝසි කරවන්නට දගලන රාජ්‍ය නොවන සංවිධාන උත්සාහ ගන්නේද  මහින්දගේ බල කෑදරකමින් තමන්ගේ යටි අරමුණු සපුරා ගැනීම සදහාය.
මහින්ද නොම්මර එකේ බල පෙරේතයෙකු වි ඇත.එසේ නැතිනම් 19වැනි සංශෝධනයෙන් අවුල් වියවුලක් බවට පත් කර ඇති රටට බල කේන්ද්‍රය අහිමි කරන්නන්ට උල්පන්දම් දෙන්නේ නැත.මෛත්‍රී දෙවැනි වර ජනාධිපතිවරණයට තරග කලහොත් ඇප මුදලද රාජසන්තක විය හැක.ඔහු ජනාධිපති කරවන්නට දැන් ශ්‍රිලනිපයක් නැත.පොහොටුවේ බහුතරයක් මෛත්‍රී ප්‍රතික්ශේප කරති.රනිල්ගේ තත්වයද එසේමය.තමන්ගේ පක්ෂ නායක කම ඉවත් කරන්නට උද්ඝෝෂන කල පක්ෂයක් ඔහු ජනාධිපති කරවන්නට දිව යන්නේ නැත.පාක්ෂිකයන්ට රනිල් තිත්තය.මහින්දට තරග කල නොහැක.
රටේ නායකත්වය තීන්දු කිරීමේ තරගය පාර්ලිමේන්තුවට ගෙන ආ යුත්තේ ඒ නිසාය.එවිට එය රටේ ප්‍රධාන බල කණු තුන අතර තරගයක් වනු ඇත.එතැනිනුත් මහින්දට වැඩි වාසි ඇත.විමල්ලා නාදුනන මහින්ද මතුවන්නේ බලයේ අවශ්‍යතාවය දැනී ඇති විටය.ජාතික මතවාදයට වඩා රනිලුත් මහින්දත් මෛත්‍රීත් හීන දකින්නේ තමන්ගේ බලය රදවා ගත හැකි ආකාරයක් පිලිබදවය.යහපත් ,නොබිදුන රටක් ඔවුන්ට ඇවැසි කරන්නේ නැවතත් මැතිවරනයකදී ඡන්ද ටික ඩැහැ ගැනීමට පමණි.

Tuesday, February 12, 2019

අරුන්, මේ උඹට

අරුන් මිත්‍රයා,
මගේ හිත කියන්නෙම උඹ යන්න හදන්නෙ වැරදි ගමනක් කියල.මෙච්චර කාලයක් උතුරෙ ඉන්න උඹලගේ ප්‍රශ්න දැනෙන බාසාවෙන් අපිට කියන්න එකෙක් හිටියෙ නෑ.එහෙව් එකේ කණට ගහන්න වගේ උඹ කියවන අඩු පාඩු, දුක් ගැනවිලි අපිට දැනෙන්නෙ ඊයම් බරු වලටත් වඩා සැරට.පාලකයො අපෙන් වසන් කරපු දේවල් බැමි කඩාගෙන එළියට දැම්මට දෙමළ මිනිස්සු තරම්ම සිංහල මමත් උඹට ගරු කරනව. දෙමළ දේශපාලනේ උරුමක්කාරයො වගේ පෙනී ඉන්න  පක්ෂ දෙක තුනක දේශපාලන හොරු ටිකගෙ නිරුවත හෙලි කරපු එක නම් සුපිරි.හැබැයි මට ඒක පේන්නෙ කුල වාදය ඉහ වහා ගිය උතුරෙ අඩු කුලේ පීඩිතයන්ගෙ නැගිටීමක් විදියට.උඹේ ටාගට් එක ඒ උසස් කුලේ සුපිරි පැලැන්තිය.

ආවා කල්ලිය හෝ මොකක් හරි නමින් තියෙන උඹේ කණ්ඩායම කඩු කිණිසි අරන් විසදන්න හදන සමාජ අසාධාරනේ මොකක්ද ඇහුවම උඹට ඒකට උත්තර නෑ.උතුරෙ උනත් දකුණෙ උනත් නීතියක් අධිකරණ පද්ධතියක් (ඒව ගැන කතා කරල වැඩක් නැති එක වෙනම කතාවක්) තියෙන රටක එහෙම ප්‍රශ්න විසදන එක කිසිම ප්‍රබුද්ධ සමාජයක් අනුමත කරන්නෙ නෑ. හුදකලා සිද්ධි කියල උඹම  කියන ඒවට උඹේ මැදිහත්වීම හරි අමුතුයි මචං.පොලීසි ගානෙ දුවන්න ලෝයර්ලට ලක්ස ගණන් ගෙවන්න (හිරු බලයෙදි උඹ පිලිගත්ත) උඹට කොහෙන් සල්ලි එනවද මං අහන්නෙ නෑ.දැනට ඒක වැඩක් නෑ කියමුකො.ඉතිං මට මෙව්ව එක්ක මැවෙන්නෙම දෙමළ ත්‍රස්තවාදෙ මුල්ම කාලෙ උතුරෙ සිද්ද උනා කියල අහල, කියවල තියෙන ජවනිකාමයි.ආවා ගෲප් කෙසේ වෙතත් මාස්ටර් ගෙ කල්ලිය කියල එකක් බිහිවෙන්න තියෙන අවස්ථාව 80% ක් විතර කියල මට හිතෙනව.

සිස්ටම් එක වෙනස් කරන්න නම් නරා වලට බහින්නම වෙනව මචං.උතුරෙ සාම්ප්‍රදායික දේශපාලනෙන් උඹට තැනක් තිබ්බත් ගන්න එපා.වරෙන් ජාතික දේශපාලනේට.උඹේ අදහස් වලට ගොඩක්ම ලග ප්‍රධාන පක්ෂ දෙකෙන් එකකට හේත්තු වෙලා උන්ගෙන් වැඩ ගනින්.උතුරට වෙලා කෑ ගහල තමන්ගෙ වාසියට මොනව හරි කඩා වඩා ගන්න දේශපාලනේට තිත තියල ප්‍රධාන ප්‍රවාහයෙන් වැඩක් ගනින්.ඒ හයියෙන් උතුරෙ ඉන්න අපේම එවුන්ට අඩු තරමෙ දකුණෙ අපිට තියෙන සොච්චම් පහසුකම් ටිකවත් දිනල දියන්.දකුණෙ සිහල එවුන් තමන්ගෙ සිංහල එවුන්ටත් උතුරෙ දෙමළු තමන්ගෙ දෙමළ එවුන්ටත් නොකරන දේවල් දකුණෙ එවුන් උතුරට කරල දෙයි කියල විශ්වාස කරන්න එපා.රේටිංග් වැඩි කරගන්න මීඩියා වලින් දෙන ටොපී කන්නත් එපා.

ජය!
සිස්ටම් එකෙන් ෆක් වෙලා ඉන්න තවත් එක දකුණෙ එකෙක්.

Tuesday, February 5, 2019

සංචරණයට සිරි ලංකා

ලෝකයේ බොහෝ සංචාරක දර්ශක වල 2019 වසර වෙනුවෙන් සංචාරය කල යුතුම රටවල් ලැයිස්තුවේ මුල් තැන ලැබුණේ ලංකාවටය.ඒ මෙහි ඇති පහසුකම් වලට වඩා ස්වභාවිකව අපට ලැබී ඇති දායාද වලට පිං සිදු වීමටය.ලංකාවේ තවමත් හරි හමං කර්මාන්තයක් ලෙස සංචාරක කර්මාන්තය දියුණු වී නැත.ස්වාභාවික සෞන්දර්යයත් නවීනත්වයත් එක් කරගනිමින් තායිලන්තය අද සිටින්නේ අපට වඩා ගව් ගණනක් ඉදිරියෙනි.නිසි වැඩපිලිවෙලක් නැතිකමින් රටම අභාවයට යද්දී සංචාරක කර්මාන්තය පමණක් යහ මග යතැයි අපේක්ෂා කිරීමෙන් පලක් නැත.කෙසේ වෙතත් රටට පැමිණෙන විදේශිකයෙක් නැවත මේ රටට එන්නට නොසිතන මට්ටමට වැඩ කරන්නට ලංකාවේ ඉන්නා මිනිසුන්ගේ හැසිරීමට හැකි වී ඇත.පොදු සේවා භාවිත කරන විදේශිකයන් සහ සුද්දෙන්ම ගසා කෑමට ලක් වෙමින් ඇත.ප්‍රධාන නගර ආශ්‍රිත  පිරිසිදු පොදු වැසිකිලියක් සොයා ගැනීම කලු නික සොයන්නා තරමට අපහසු වී ඇත.රටට විදේශ විනිමට සිමාවකින් තොරව ඉපයිය හැකි කර්මාන්තයකට රටක් වශයෙනුත්,රජයක් වශයෙනුත් අප ප්‍රමුඛත්වය දී ඇත්තේ එලෙසය.
ගුවන් තොටුපටලින් මෙරටට ඇතුලු වන විදේශීය සංචාරකයන්ට රටේ තොරතුරු සදහන් ව ඇති යාවත්කාලීන වූ තොරතුරු පත්‍රිකා නිකුත් කරන්නේ නැත.ඔවුන්ගේ පහසුව සදහා හදිසි සේවා දුරකතන අංක හෝ අදාල තොරතුරු ලබා දෙන්නේ නැත.සංචාරකයන් අපහසුතාවය පත් කරන පුද්ගලයන්ට එරෙහිව ක්ෂණිකව නීතිය ක්‍රියාත්මක කිරීමටත්, යම් අපහසුතාවයකට මුහුණ දෙන විදේශිකයකුට තමන්ගේ චාරිකාවට අවහිර නොවී පැමිණිලි හා සාක්ෂි ඉදිරිපත් කරන්නට මාර්ගයක් නැත.අන්තර්ජාලය මගින් කටයුතු කරන්නට බොහෝ නීතිය ක්‍රියාමක කරන ආයතන තවමත් බියකින් පසුවේ.
සංචාරය අවසානයේ රටින් පිටවන මොහොතේදී තමන් ලංකාවේදි මුහුණ දුන් අප්‍රසන්න අතිදැකීම් පිලිබදව පැමිණිලි කරන්නට හෝ සාක්ෂි ලබා දෙන්නට ගුවන්තොටුපල තුල පහසුකම් නැත.
ඉතා සුලු උත්සාහයකින් විශාල ප්‍රතිලාභ අතිකරගත හැකි අවස්ථාවන් රටක් වශයෙන් අප අහිමි කරගන්නේ එලෙසය.

Sunday, January 13, 2019

අහිමි පෙම

ආදරිය,
උඹ බැදෙන්නේ මේ වගේ බැදීමකයැයි සිහිනෙන් වත් සිතුවා නම්,සමු නොගත් අතීතය දුකින් ඉවර කරන්නට නොතිබුණා.

Tuesday, January 1, 2019

ආදරිය

ආදරිය,
උඹේ කෙලි කවටකම්
තවත් මට බෑ දරා ගන්නට
උඹේ හද මඩල දැන්
තවත් ඉඩ නෑ මටත් ඉන්නට

අනේ දැන් හිදින්නට දියන් මට
අතීතයේ රස මතක ගෙන
කිතිකවන්නේ නැතිව හිත