චන්දිමාගෙ ෆෝන් එක රින් වෙන එක මොහොතක් වත් බලන් ඉන්න තරම් ඉවසිල්ලක් මට තිබ්බෙ නෑ.. ගතවෙන නිමේශයක් පාසා මම චන්දිමාට හිතෙන් දොස් කීවා..
එහා කොනෙන් චන්දිමා ෆෝන් එක කනේ තියාගන්න පරක්කුවට මම මගේ ප්‍රශ්න ටික ලිහලා දැම්මා..
"චන්දිමා උඹට මතකද උඹගෙ බර්ත්ඩේ පාටි එක දවසෙ මුණ ගැහුන මනුස්සෙක්ව මම ප්‍රෝග්‍රෑම් එකට ගත්තා.. ඩිලාන් කියලා..?"
"ඇත්තටම ඒ කවුද චන්දිමා? "
"එයා ඔයාගෙන් මොන වගේ ලෙඩකටද බෙහෙත් ගත්තෙ??"
"සාවී.., මොකද කලබල වෙලා? මොකක්ද ප්‍රශ්නෙ?"
"ඩිලාන් ඔයාගෙන් බෙහෙත් ගත්තෙ මොන වගේ ලෙඩකටද කියන්නකො චන්දිමා.. ඔයා එයාව දන්නෙ කොහොමද?"
"මං අවුරුදු කීපයක ඉඳලා ඩිලාන්ව දන්නවා බං.. එයාට නින්ද යන්නෙ නැති ගැටලුවක් තියෙනවා කියලා මගෙන් ට්‍රීට්මන්ට් ගන්නෙ.. ඔයාගෙ ප්‍රෝග්‍රෑම් එකේදි කියපු කතා ටික මගෙත් එක්ක කියලා තියෙනවා.. ඒ නිසා තමයි එයා ගෙ ගැටලුව තියෙන්නෙ. හරියටම කියනවා නම් ඩිලාන් හයි ඩීප්‍රෙශන් සිටුවේශන් එකක ඉන්නෙ ..මාසෙකට වතාවක් විතර ඇවිත් මගෙත් එක්ක කතා කරලා බෙහෙත් අරන් යනවා..එයා හරි හොඳ මනුස්සෙක්. අතීතය ගැන කල්පනා කරන්න එපා කිව්වට එයාට එතනින් ගැලවෙන්න අමාරුකමක් තියෙනවා. "
මං හිතන්නෙ මගේ හිතට සැනසිලිදායක උත්තරයක් චන්දිමාගෙන් හම්බුණා..බරපතල මානසික ව්‍යාකූල කමක පැටලුන මනුස්සෙක්ව ප්‍රෝග්‍රෑම් එකට ගෙන්න ගත්තා කියන ලේබලය වැදුනොත් මම මේ වෙනකන් පවත්වාගෙන ආව මගේ ප්‍රමිතිය කුඩු පට්ටම් වෙලා යනවා.
ඒත්... , ඒත් මට තිබ්බෙ ප්‍රෝග්‍රෑම් එකේ තත්වයට හානි වෙයි කියන බය විතරක්ම ද.. ?
මං පියවි සිහියට ආයෙමත් ඇවිත් හෙඩ් සෙට් එක දාගන්නකොට ඩිලාන් තෝර ගත්තු ඊලඟ සිංදුව අවසන් වෙන්නත් ලඟයි..
"දිල්හානී දුව නී.. නාඬා නිදියන්නේ.. "
"ඩිලාන් ඔයාට ඒ ගීතයත් එක්ක තියෙන මතකය මොන වගේද...?"
"විවාහක යුවලකට තමන්ගෙ විවාහයෙන් පස්සෙ තියෙන ලොකුම බලාපොරොත්තුව දරු සුරතල් විඳින එක සාවිත්‍රී.., ටිකෙන් ටික අපි පරිණත වෙද්දි දරු උණුහුම කියන සැනසිල්ල කොයි තරම් වටිනවද කියලා දැනෙන්න ගන්නවා.. ඉතිං විවාහයෙන් වසර කීපයකට පස්සෙ මමත් මගේ බිරිඳත් දරුවෙකු ගැන හීන මවන්න පටන් ගන්නවා.. ඇත්තටම අපි දෙන්නම පුංචි දරුවන්ට හරි ආදරෙයි.."
"මාස කීපයක උත්සාහයෙන් පස්සෙ බිරිඳ ගැබ් ගත්තු බව අපි දැන ගන්නවා.. ඒ දවසෙන් පස්සෙ අපි තවත් වගකීමෙන් වැඩ කරන්න පටන් ගත්තා.."
"හැබැයි මම කලින් කිව්වා වගෙම ඒ වෙද්දි මම ව්‍යාපාර බංකොලොත් වෙලා ණය කන්දක හිර වෙලා ඉන්න කාලයක්.. බිරිඳ රැකියාව කරන ගමන් ඇයගේ වැටුපෙන් පුද්ගලික වෛද්‍ය මධ්‍යස්ථානයක වෛද්‍යවරයෙක් මුණ ගැහිලා උපදෙස් ගත්තා.. අපි කොහොමත් සැලසුම් කලේ රජයේ රෝහලකදි දරු උපත සිද්ද කරන්න.."
"කිරි හීන එක්ක අපේ ලෙයින් ජාතක උන සිඟිත්තිය බිරිඳගෙ කුස ඇතුලෙ දවසින් දවස හොඳින් වැඩෙමින් හිටියා.."
"මං හීන ගොඩක සහනය විඳිමින් හිටියෙ.."
"මගේ සිඟිත්තිය එක්ක රටපුරා ඇවිදින්න.. "
"ඇයට ලෝකය ගැන කියලා දෙන්න.. ,"
"වෙනකක් තියා ඇය වැඩිවියට පත් උනාම චාරිත්‍ර ඉශ්ට කරන ඒ සංස්කෘතික පසුබිම ඇයට කියලා දෙන්නෙ කොහොමද කියන එක ගැන පවා මම හිතූවා.."
"ජීවිතේ කියන්නෙ මල් යහනාවක් නෙවෙයි සාවිත්‍රී.. .මම මගේ දෛවය වෙනස් කරන්න පුදුම තරම් මහන්සි උන මනුස්සෙක්... ඒත් සටනකින් පස්සෙදි හරි අපිට කර්මයට මුහුණ දෙන්න ම වෙනවා.."
"කුසට මාස හයක් විතර වෙද්දි එක්තරා දවසක බිරිඳගෙ අතකුත් කකුලකුත් හිරි වැටෙන්න ගත්තා.. ගැබ්නි කාලෙ ඔහොම සංකූලතා එන බව වැඩිහිටියො කියපු නිසා අපි ඒ දවස බලලා අඩුවක් නොවුන තැන පහු වෙනිදා රෝහලට ගියා.."
"බිරිඳව රෝහලට ඇතුලත් කරගත්තු වෛද්‍යවරු පරීක්ශන කීපයකට පස්සෙ බිරිඳත් දරුවාත් අතර තියෙන සම්බන්ධක නහර වලින් සිද්ද වෙන ලේ ගමනාගමනය නතර වී ඇති බව සොයා ගත්තා.. ඒ අයගෙ තීරණය හදිසි සැත්කමකින් දරුවා බිහි කරන එක.."
"එවැනි කාලයක බිලිඳු දරුවන්ගේ පෙනහළු වර්ධනය වී නැති නිසා ඒවා හැකි ඉක්මණින් වර්ධනය වීමට අවශ්‍ය බෙහෙත් ගණනාවක් එන්නත් කරලා අධික වේදනා සහිත සිසේරියන් සැත්කමකින් අපේ සිඟිත්තිය මේ ලෝකෙට බිහි උනා.."
"දරුවෙක් වෙනුවෙන් ගැහැනියක් මොන තරම් වේදනාවක්, අසරණකමක්, තනියම දරා ගන්නවද කියන එක හිතාගන්න බැරුව තියටර් එක ලඟ මම බලන් හිටියා.. "
"නොමේරූ දැරිය සතපවපු දැඩි සත්කාර වීදුරු කුටීරය අදාල ඒකකය ට අරන් යද්දි රෝස පාට ඇඟිලි තුඩු දිහා බලලා මම අපමණ සතුටු උනා.."
"දන්නවද සාවිත්‍රී.., සැත්කමට පෙරාතුවත් ඉන් පස්සෙත් වෛද්‍යවරු, හෙදියන් හැමෝම දරුවගේ ජීවත් වීමේ සම්භාවිතාවය 50:50 බව කියද්දි අපි හැමෝම ඒ අය එක්ක කේන්ති ගත්තා.. කුලුඳුලේ උපදින සිඟිත්තියට කරදරයක් නොවෙන්නයි කියලා බාර හාර නොවුන පංසලක්, දෙවියෙක් හෝ දේවාලයක් ඇති කියලා මම හිතන්නෙ නෑ.. ඒ වෙලාවට මිනිස්සු අන්ත අසරණ තත්වයට පත් වෙනවා... "
"මොන තරම් උගත් කෙනෙක් උනත් ඒ වෙලාවට විද්‍යාවට එහා ගිය හාස්කම් වෙනුවෙන් දෙවියන් යදිනවා... දරු කැක්කුම ඒ තරම් විශාලයි සාවිත්‍රී.. හරි විසාලයි.."
"" ඩිලාන්... අපි බ්‍රේක් එකකට ගිහින් එමු..,"
හැඩි දැඩි මිනිසෙකුගේ දෑසින් කඳුලු කඩන් වැටෙන හැටි ජීවිතයේ පලමු වතාවට මම බලන් සිටියෙමි.. පපුවෙන් පටන් ගත් විදුලි ස්ඵන්දනයක් ස්නායු පද්ධතිය හරහා ගොස් මොලය ගිනියම් කරන හැටි ස්ටූඩියෝවේ වායු සමීකරණය පරයා මට දැනෙන්නට විය.
"කමක් නැහැ සාවිත්‍රී.., අපි මේ මතකය සම්පූර්ණ කරලා ඉමු.."
පරාජිත එහෙත් පැහැදිලි හඬින් ඔහු නැවත ආරම්භ කලේය..
"දවස් හතරක සටනකින් පස්සෙ, මූසල දවසක මැදියම් රැයක අපේ පුංචි කුමාරිකාව පරාජයට පත් වෙනවා.. ප්‍රසූතියට ආසන්න ගැබිනි මව් වරුන් ඉන්න රෝහල් වාට්ටුවක කොරිඩෝවකට වෙලා මම බිරිඳව තුරුලු කරන් පැය ගණනාවක් ඇඬුවා සාවිත්‍රී.., "
"දරුවා වෙනුවෙන් දෙතනින් එරුනු කිරි නිදහසේ බිරිඳගෙ ඇඳුම් තෙත් කරද්දි ඇය දෝරෙ ගලායන තරම් ඇඬුවා.. අපේ අසරණකම ගැන අපිටම දුක හිතුනා....ඒ හැඟීම දරාගන්න හරි අමාරුයි..ඊටත් වඩා මට බිරිඳ ඉස්සරහා මගේ දුක පිට කරගන්න බැරුව ලත උනා..මං හීන දැක්ක අනාගතය හැබෑ නොවෙන දුකට මගෙ ඇහෙන් කඳුලු වැටුනා නම් බිරිඳ තවත් කඩා වැටෙනවා..
"මට එවෙලෙ මොනවා කරන්නද කියන හැඟීමක් තිබ්බෙ නෑ.. මං වෙනුවෙන් මගේ මිත්‍රයන් හැකි ඉක්මණින් එයි කියන බලාපොරොත්තුවෙන් මම එස් එම් එස් එකක් යැව්වා.. බිරිඳගේ හිත ශක්තිමත් කරන්න නම් මම ඇයව දරාගන්න ඕනිමයි.. ඒත් අභ්‍යන්තරයෙන් මම සම්පූර්ණයෙන් ම කඩන් වැටිලා හිටියෙ.. යාලුවො ඇවිත් මගෙ ලඟින් ඉඳියි කියන කාරණාව මම ලොකුවට බලාපොරොත්තු උනා.."
"පහුවෙනිදා උදේ හත අට වෙද්දි ආරංචිය ලැබුණ නෑදෑයො බොහෝ දෙනෙක් රෝහලට ආවා... ඒ වෙද්දි අතේ තිබුණු මුදල් සියල්ලම ඉවර වෙලා මම හිටියේ.. අලුත උපන් බිලි‍ඳියට අවශ්‍ය රෙදි ගන්න ලෝභ නැතුව මම අතේ තිබුණු මුදල් වියදම් කරලා පැය හතලිස් අටක් ගත වෙලා තිබුණෙ නෑ එතකොට.."
"මෙහෙම වෙලාවක මිනිස්සු කොහොම අසරණ වෙනවද කියල මට හිතාගන්න බෑ ඩිලාන්.. ඔයා කොහොමද හොඳ සිහියෙන් මේ දේවල් මැනේජ් කරගත්තෙ..?"
මනුස්සෙක්ගෙ ජීවිතයට මේ තරම් සංවේදී දේවල් එක පිට එක වෙන එක කොයිතරම් අවාසනාවක්ද ... මගේ උගුර හිර වෙලා කතා කරගන්න අපහසු වෙන්නෙ ලොකු දුකක් දැනුන වෙලාවට.. ඩිලාන්ගෙ මේ මතකය මාව ලොකු අපහසුතාවයකට පත් කලා.. කෑ ගහලා අඬන්න හිතෙන තරමට දුකක් උනත් ප්‍රෝග්‍රෑම් එක ඇතුලෙ මට එහෙම කරන්න අවකාශයක් නෑ.. ඒත් කඳුලු නතර කරන්න ක්‍රමයක් මං දැනන් හිටියෙ නෑ.. ඇස් වලට මෝදු වෙච්චි කඳුලු කැටි දෙක තුනක් මික්සර් එක ලඟට වැටුනම තමයි මට ඒ ගැන කල්පනා උනේ...
"ඉතිරි වැඩ කටයුතු වලට මුදල් අවශ්‍ය උනොත් මගේ යාලුවො ඒ වෙනුවෙන් යමක් කරයි කියන බලාපොරොත්තුව නිසා තමයි මම වැඩිමනක් ඒ මොහොතට යාලුවන්ව බලාපොරොත්තු උනේ.. විවාහයට අකමැති උන බිරිඳගේ පාර්ශවයෙ අය මම මුදල් නැතිව අසරණ වෙලා ඉන්න බව දැන ගත්තා නම් එවෙලෙදි නැතත් කොයිම වෙලාවකදි හරි බිරිඳට දොස් පවරණ බව මං දැනන් හිටියා..."
"අපි අපේ ජීවිත වල මිල මුදල් නිසා පුදුම විදියට අසරණ වෙනවා සාවිත්‍රී.., උප්පැන්න, මරණ සහතික එක්ක හෙම්බත් වෙලා හිටි මාව පැත්තකට අරන් ගිහින් එපා කියද්දි මගෙ මහප්පගෙ දුව මට යම් මුදලක් දුන්නා.. ඇත්තටම හරි හමන් උසස් අධ්‍යාපනයක් ලබලා නැති ස්වයං රැකියාවක් කරමින් හිටිය එයාට ඒ අදහස කොහෙන් ආවද කියලා මට තවම හිතා ගන්න බෑ..."
"යම් උපකාරයක් වෙනුවෙන් මං සංසාරිකව ස්තූතිවන්ත වෙනවා නම්, ඒ මේ සහෝදරිය කරපු උදව්ව සාවිත්‍රී.. ඒ මුදල නිසා ඒ මොහොතෙ මට ලැබුණ සහනය කොයිතරම් ද කියන්න මට වචන නෑ..."
"මට දුන්නු මුදලින් මිලදී ගත්තු පුංචි පෙට්ටියක සතපවලා අපේ පුංචි කුමාරිකාව සුසාන භූමියට අරන් ගියෙ මේ අත් දෙක උඩ තියාගෙන සාවිත්‍රී... මේ ලෝකෙ අම්මෙක්ට තාත්තෙක්ට කිසිම දවසක ඒ වගේ අවාසනාවන්ත අවස්ථාවට මූණ දෙන්න නොලැබේවා කියන එක තමා මගෙ එකම ප්‍රාර්ථනාව..."
"සියලු සන්තෑසි අහවර වෙලා, බලාගත්තු අත බලන් හිටපු දවල් එකට විතර අර මගේ ල‍ඟින්ම ඉඳීවි කියලා හිතපු යාලුවො ඇවිත් සිද්ධ වෙච්චි දේ කියලා කෝල් නොකරපු එකට මට දොස් කීවා.."
"හවස් වෙද්දි මට සිහිය විකල් වෙනකන් මත් පැන් පානය කරලා හිත නිදහස් වෙනකන් අඬන්න උවමනාව තිබ්බා. දවල් දවසම තොල කට විකාගෙන මම අවශ්‍ය කරන සියලු රාජකාරි කලා.. බිරිඳව ශක්තිමත්ව තියන්න අවශ්‍ය නිසා ඇය ඉදිරිපිට මම ධෛර්‍යවන්තව පෙනී හිටියා.එයාට කෑම ගෙනිහින් දුන්නා.. "
"අවාසනාව කොයි තරම්ද කියනවා නම් කතා කරපු කිසිම යාලුවෙක් ට හවස මං ඉන්න තැනට එන්න හැකියාවක් තිබ්බෙ නෑ.. සමහරවිට එන්න උනන්‍ඳු නොවුනද මංදා.. අර අක්කා දුන්න මුදලින් ඉතිරිය අරන් මම ජීවිතේ පලවෙනි වතාවට තනියෙන් මත් පැන් පානය කලා.."
"මේ තියෙන්නෙ මරණ සහතිකය වෙනුවෙන් කලබලේ මම අපේ කුමාරිකාවට දාපු නම.. "
ඩිලාන් ඔහුගේ දකුණු අතේ ඇතුල් පැත්තේ තිබූ පච්චා සටහනක් මට පෑවේය..
රේඛාවන්ගෙන් සටහන් කල මවටත් පියාටත් මැදිව සිටි සිඟිත්තියකගේ සටහනට පහලින්
"Hope Abeysinghe ❤️ "ලෙස සටහන් කර තිබුණි.
සිඟිති දියණියත් , අවාසනාවන්ත ඇගේ දෙමව්පියන් වෙනුවෙනුත් නැගුනු සංතාපය නිසා බිඳුනු හඬින් මම නම කියවීමි..කියවා මයික්‍රෆෝනය වසා දැමීමි..